Ka luajtur vetëm 20 minuta por kanë mjaftuar për t’i dhënë Shqipërisë një fitore shpresdhënëse. Armando Broja, autori i golit në ndeshjen përballë Hungarisë në një intervistë për “Supersport” tha se ndjehet krenar për fanelën kuq e zi. Sulmuesi i Chelsea u shpreh megjithatë se nuk di të thotë nëse ndjehet i vlerësuar nga trajneri Reja.
“Shumë krenar për këtë fanelë, për këtë ekip. Ka qenë ndeshje e rëndësishme, duhej ta fitonim medoemos për tre pikët. Më futi trajneri dhe shyqyr Zotit bëra gol dhe u kënaqëm të gjithë.
Goli vjen kur do goli, ka raste që luaj mirë e nuk vjen, më e rëndësishme është të marrësh tre pikë. Ekipi është më i rëndësishëm, unë luajta 20 minuta, por gjithë ekipi ka luftuar në fushë dhe jemi të kënaqur. Jam lojtar që do të luajë gjithë ndeshjen, por ekipi është më i rëndësishëm dhe kur të fut trajneri 20 minuta, 10 minuta, asnjë, duhet të jesh pjesë e ekipit e duhet të mos bëhesh me nerva dhe të vazhdosh me futbollin. A ndjehem i vlerësuar nga Reja? Nuk di çfarë të them”./Opinion.al
