Kryeministri Edi Rama foli para mjekëve të spitalit të QSUT për bashkëpunimin me spitalin izraelit “Sheba Medical Center”.
Gjatë fjalës së tij, ai tha se specialistët e spitalit izraelit po e bëjnë këtë jo për përfitime personale, por për shkak të ndihmës që shqiptarët kanë dhënë për hebrenjtë gjatë Holokaustit.
Teksa e quajti një borxh moral, Rama theksoi se specialistët izraelitë nuk kanë ardhur për të fituar para apo as ndonjë favor tjetër nga Shqipëri.
“Miqtë nga Izraeli nuk kanë këtu asnjë interes. Nuk janë këtu për të fituar asgjë, as para, as reputacion, as ndonjë favor tjetër nga Shqipëria. Janë këtu për të na mbështetur dhe siç e dëgjuat nga fjala e Joelit dhe siç e kam dëgjuar unë, për t’i kthyer mbrapsht popullit shqiptar, në fushën e tyre, një borxh moral, për çfarë populli shqiptar bëri për hebrenjtë gjatë Luftës II Botërore.
Dhe kjo mund t’i tingëllojë shumë e bukur për të qenë e vërtetë shumë kujt që nuk e njeh popullin hebre, kjo mund t’i duket retorikë shumëkujt që nuk e ka idenë se çfarë do të thotë për hebrenjtë Holokausti dhe çfarë do të thotë ndihma e gjithsekujt në atë kohë, ndaj qoftë edhe një hebreu të vetëm, por për të gjithë ata që e dinë se çfarë thellësie ka në shpirtin e popullit të Izraelit dhe vendi të veçantë ka në mendjen e popullit të Izraelit dhembjet e Holokaustit dhe gjithë, ai pak solidaritet që hebrenjtë gjetën ndërkohë që shumica dërrmuese i trajtoi si mish për top, është absolutisht kështu dhe vetëm kështu”, u shpreh Rama.
