Udhëheqësi më i lartë i Kinës, Xi Jinping, do të fillojë një mandat të tretë në krye të vendit të tij.
Kongresi njëjavor i Partisë Komuniste përfundoi të shtunën me fillimin e një Komiteti të ri Qendror – udhëheqja qendrore prej 200 anëtarësh e partisë – e cila do të zgjedhë një listë të re të liderëve të lartë të dielën.
Shumë zyrtarë kryesorë – përfshirë kryeministrin Li Keqiang – u tërhoqën nga pozitat udhëheqëse, lëvizje që i jep Xi-së mundësinë që të emërojë aleat të rinj.
Xi pritet gjerësisht të emërohet sekretar i përgjithshëm i partisë për pesë vjet të tjera të dielën, duke hapur rrugën për një sundim të mundshëm të përjetshëm.
Më 2018, Xi kishte çfuqizuar kufizimin që një lider duhet të mbante vetëm dy mandate në postin e presidentit, duke i mundësuar vetes që të mbesë në këtë pozitë.
Në kongres u tha se Xi është lideri më i fuqishëm i Kinës që nga Mao Zedong.
