Partia më e re në Shqipëri, Bindja Demokratike regjistrohet në KQZ. Këtë të shtunë, organi që merret me zgjedhjet në Shqipëri ka votuar me 4 vota pro, për regjistrimin e partisë së zotit Astrit Patozi.
Me këtë votim, Bindja Demokratike bëhet pjesë e garës për zgjedhjet lokale.I vetmi që ishte kundër regjistrimit të Bindjes Demokratike ishte, kreu i KQZ-së, Klement Zguri, i cili në këtë institucion përfaqëson ende opozitën. Sipas Zgurit kjo parti sipas tij nuk ka ‘lindur’ ende politikisht, pasi vendimi i Gjykatës për regjistrimin e saj nuk ka hyrë ende në fuqi.
“Dëshiroj që ‘Bindja Demokratikë’ të garojë në zgjedhjet e 2019, dhe do doja që edhe subjektet të tjera të regjistroheshin në zgjedhje e 30 qershorit. Por kjo mbetet dëshirë. Unë s’mund t’ia lejoj vetes që dëshirat e mia, t’ia vendos ligjit. Data 21 prill ka qenë data e fundit për të sjell të gjithë dokumentacionin ligjorë, dhe tani që flasim që vendimi i gjykatës nuk ka hyrë në fuqi dhe Bindja Demokratike nuk ka lindur dhe të kryer vendime politike. Në zgjedhjet e 2015, kemi votuar 7 me 0 që një subjekt të mos regjistrohet dhe që ishte në të njëjtat kushte që mos regjistrohej. Unë nuk jam i bindur se subjekti në fjalë nuk plotëson kriteret ligjore për të garuar në zgjedhjet”, tha Klement Zguri.
Ndërkohë që pro votoi nënkryetari Denar Biba, anëtarët Bledar Skenderi, Edlira Jorgaqi dhe Rezarta Bitri. Pasditen e së enjtes kjo forcë politike u regjistrua dhe në Gjykatën e Rrethit të Tiranës.
Për regjistrimin e saj u nevojitën vetëm 4 mijë firma, pasi një prej themeluesve, Andi Përmeti, pranoi mandatin e deputetit dhe u betua të enjten në kuvend, duke e bërë Bindjen Demokratike parti parlamentare. Ky është një avantazh që i shmang detyrimin ligjor të paraqitjes së 30 mijë firmave, nëse nuk do ishte parti parlamentare./ Opinion.al
