Fatmir Xhafaj sapo vuri këmbën në pragun e Ministrisë së Brendshme u sulmua nga opozita, duke kërkuar me ngulm largimin e tij për shkak se kishte punuar në organet e rendit dhe sigurisë në kohën e diktaturës, sulme këto që nuk u ndalen por arriten kulmin me akuzat për vëllanë e dënuar në Itali.
Një figurë e lartë politike në Partinë Socialiste, Xhafaj dha dorëheqjen si ministër i Brendshëm, pikërisht në momentin ku me operacionin e ndërmarrë “Forca e Ligjit’ u arrestuan nga policia disa anëtarë të bandave më të fuqishme të vendit që ishin përfshirë në trafiqet ndërkombëtare të drogës.
Sipas policisë, në rrejtën e këtij operacioni deri tani u kapën 300 persona e në mes të tyre dy deputetët ish-socialistë: Arben Çuko dhe Arben Ndoka.
Largimi i sotëm i tij, është interpretuar në forma të ndryshme nga mediat në vend, pasi që prej muajit maj të këtij viti opozita e kërkonte me ngulm një gjë të tillë, veçanërisht pas publikimit të audiopërgjimit mes dëshmitarit X dhe Agron Xhafajt, vëllait të ministrit të Brendshëm.
Në audio-përgjimin në fjalë, mes dy personazheve, flitej për trafikim të lëndëve narkotike në qytetin e Vlorës. Siç edhe mund të pritej, pas publikimit të këtij materiali, politika shqiptare në të dy kampet u shfaq e trazuar, duke nxitur opozitën të nisë një betejë tjetër për largimin e ministrit të Brendshëm.
PD nga ana e saj kërkonte largimin e menjëhershëm, ndërsa kryeministri Edi Rama ndërmori betejën e re për ta mbrojtur ministrin Xhafaj.
Akuzave të opozitës ai iu kundërpërgjigj se personalisht i kishte kërkuar partnerëve ndërkombëtare që të bënte ekspertizën dhe se rezultoi se audiopërgjimi i dalë nga selia e PD-së ishte një montim.
Rama asaj kohe do të deklaronte se nëse Xhafaj do të ishte e implikuar do të reagonin ambasadorët e SHBA-së dhe BE-së, duke shtuar më pas se ministri ka mbështetjen e ndërkombëtarëve. Por, ambasadori i SHBA-së, Donald Lu reagoi duke i kërkuar kryeministri Edi Rama që të mos flasë në emër të tij. “Kryeministri duhet të flasë në emrin e tij dhe ne do të flasim në emrin tonë. Ne jemi duke i shqyrtuar pretendimet që janë ngritur në lidhje me vëllain e Ministrit Xhafaj”, – do të deklaronte Lu më 12 maj.
Për 5 muaj më radhë opozita kërkonte në mënyrë permanente dorëheqjen e ministrit të Brendshëm, duke e akuzuar në lidhje me audiopërgjimin me dëshmitarin “X” që rezultoi se ishte Albert Veliu i njohur me pseudonimin “Babalja”. Një tjetër akuzë e opozitës ishte fshehja e dënimit në Itali të Agron Xhafaj, si dhe ndryshimi i ligjit të Amnistisë nga ana e Xhafajt si kryekomisioner i Ligjeve në favor të vëllait të tij.
Akuza këto që u rrëzuan nga ministri.
“Duket e thjeshtë, por akoma unë nuk kam mundur të kuptoj se cili është problemi i personalitetit tim si njeri dhe si zyrtar në lidhje me çfarë bën, apo akoma më shumë se çfarë ka bërë para 15 vitesh im vëlla. Ndërkohë që nuk kam se si të kuptoj çfarë kërkohet sot tjetër përveç baltosjes sime, nëse në raport me këtë çështje as kam pasur e as kam asnjë lloj pushteti për të ndikuar në çfarëdolloj forme mbi të. Kjo është një çështje e zhvilluar në Itali, në kohën kur këta që sot e rizbuluan ishin në pushtet, dhe asnjëherë në asnjë rast, as qeveria e tyre, as Qeveria tjetër më pas dhe as kjo Qeveri nuk janë kontaktuar as shkresërisht, as informalisht nga autoritetet e një vendi tjetër për të kërkuar çfarëdo qoftë për këtë çështje”, do të deklaronte Xhafaj në konferencën e dhënë më 9 maj.
Ndërsa Agron Xhafaj do të udhëtonte drejt Italisë për t’iu dorëzuar autoriteteve për kryerjen e dënimit të mbetur.
Ndërsa Prokuroria ka nisur hetimet, duke thirrur veç dëshmitarët e videos “Babalja”, si dhe personat që kanë lidhje me cështjen si Fredi Alizoti, por edhe deputetin e PD-së, Ervin Salianji, personi që publikoi i pari audiopërgjimin, tashmë person nën hetim nga organi i Akuzës.
Parandjenja Xhafës për fatin e tij politik?
“Prisni të reja, qëndroni pranë Ardit dhe Gentit (zëdhënësat e Ministrisë), sepse kur ka bashkëpunim ka dhe rezultate”.
Kështu do të deklaronte Xhafaj një javë më parë gjatë një konference të dhënë me kreun e Policisë Federale të Gjermanisë, duke i kërkuar gazetarëve të ndjekin me vëmendje zhvillimet nga Policia dhe Ministria e Brendshme, pasi do të kishte zhvillime interesante.
Me sa duket, këto zhvillime interesante duket se nuk kishin lidhje vetëm me goditjen e bandave, si Bajrat, Avdylajt dhe arrestimin e ish-deputetëve socialistë Arben Ndoka dhe Arben Çuko, por edhe me vetë ministrin e Brendshëm, Fatmir Xhafaj.
Reagimet e opozitës
Partia Demokratike e cilësoi një fitore të saj këtë largim, e finalizuar sipas demokratëve pas një beteje 5- mujore.
Kreu i PD, Lulzim Basha shprehet se kjo betejë nuk do të ndalet nga ana e opozitës, duke shtuar se Xhafaj ishte i vetmi ministër i Brendshëm që kishte vëllanë si trafikant droge.
“Largimi i Fatmir Xhafës, të vetmit ministër të Brendshëm në Europë me vëllain trafikant droge, është një hap i rëndësishëm në betejën e opozitës për të pastruar politikën nga krimi. Me Fatmir Xhafën krimi vuri nën kontroll të plotë policinë dhe prokurorinë. Largimi i Fatmir Xhafës, të vetmit ministër të brendshëm në Europë me vëllain trafikant droge, është një hap i rëndësishëm në betejën e opozitës për të pastruar politikën nga krimi. Me Fatmir Xhafën krimi vuri nën kontroll të plotë policinë dhe prokurorinë”, shkruan Basha në Tëitter.
Por ish-kryeministri Sali Berisha shprehet se kjo lëvizje e ndërmarrë nga ana e Ramës është një skemë për të zhvendosur vëmendjen nga çështja “Dako”, ku opozita kërkon arrestimin e tij për përgjimet në çështjen Avdyli, ku kryebashkiaku i Durrësit ka folur me anëtarët e bandës të Shijakut.
“Edvini, kreu i meduzës, mafies shtetërore më të rrezikshme të Europës, shiti Xhafën për të shpëtuar Gjushin dhe lekuren e tij! Të dashur miq, pas një beteje të furishme, opozita shqiptare ia doli t’i japë një goditje të merituar familjes mafioze Xhafaj, Agron/Geroni në burg dhe aty e ka vendin Fatzi Xhafa, njeriu që futi në polici të gjitha metodat e punës të mafies së policisë sekrete hoxhiste për të mbrojtur lëkurën dhe karrigen e tij. Në një aspekt opozita ia doli. Por shtylla kryesore e botës së mafies, krimit të organizuar, korrupsionit, kreu i meduzës në Shqipëri ështe Edvin Kristaq Rama, i cili në një moment kritik për veten e tij sakrifikoi Xhafën për Gjushin dhe vendosi në krye të ministrisë një vasal të tij. Kakistokracia e Shqipërisë është në agoni. Asgjë, asnjë vasal as dhe paterice nuk shpëton Noriegën nga verdikti i afërt i revoltës popullore”, shkruan Berisha në Facebook.
Ndërsa kreu i grupit parlamentar të LSI-së, Petrit Vasili kërkon dorëheqjen e kryeministrit Edi Rama.
“Kryeministri të largohet dhe Prokuroria të hapë hetimin nga i cili ai nuk shpëton dot. Kryeministri, që ka kryer hetime paralele dhe për qëllime politike ka mashtruar botërisht për audiopërgjimin e vëllait të ish ministrit të Brendshem, sikur kishte kryer vetë një ekspertizë duhet të largohet menjëherë nga detyra për të mos penguar dhe hapur rrugë hetimit të plote, të një shpërdorimi pushteti të paprecedente në historinë e pluralizmit. Prokuroria i është fshehur detyrës dhe aq më e rëndë është që e ka shpërdoruar atë duke mbyllur hetimin ndaj kryeministrit të paditur. Ankimimi i bërë nga opozita është një shans i madh për prokurorinë për të treguar se ajo respekton ligjin dhe jo banditët me pushtet, si dhe qe nuk është pale në një manipulim shtetëror të përmasave shumë të mëdha”, reagoi Vasili.
