Pak ditë pas deklaratës së kryeministrit Rama, i cili gjatë takimit me krerët e bashkive, kërkoi kalimin nëpër “filtra” të punonjësve të Ujësjellës Kanalizime, ka ardhur edhe shkarkimi i dhjetra punonjësve në Vlorë.
Sipas “Abc News”, furtunë shkarkimesh janë bërë në Ujësjellësin e Vlorës, ku raportohet se drejtoresha Elona Hodaj ka hequr nga puna të paktën 30 persona.
Bëhet e ditur se shkak i shkarkimeve është bërë fakti se punonjësit nuk shkonin rregullisht në punë dhe se disave prej tyre nuk u përputhej diploma me detyrën që kishin.
Kujtojmë se një javë më parë, Rama iu tha krerëve të bashkive, se duhet të marrin masat vetë përpara se pasqyrat e reformës të nxjerrin të “palara” që do të mbeten në historinë e humorit dhe satirës shqiptare.
“Çfarë profile dhe kapacitetesh kanë ndërmarrjet e ujësjellësit. Sa janë në profilin e tyre punonjësit e ujësjellësve. Të merrni masat vetë përpara se këto pasqyra të tregojnë gjëra që do mbeten në historinë e humorit dhe satirës shqiptare”,-tha Rama./Opinion.al
