Në një dalje për mediat pas mbledhjes së kryesisë së PD-së, Kryetari i Këshillit Kombëtar të Partisë Demokratike, Edi Paloka tha se propozimi i tij për të zgjedhur përfaqësues nga të dyja palët për të verifikuar firmat dhe për të mbajtur një Kuvend të përbashket nuk u pranua por u propozua një datë tjetër për Kuvendin e PD.
Më tej ai deklaroi se sot janë vënë në diskutim vlerat e PD-së pasi sipas tij gjatë mbledhjes dy nënkryetarët e PD thanë hapur mirsetëvijë shkatërrimi i partisë po të jetë e nevojshme.
“Janë dy palë sot në PD dhe nuk kanë besim tek njëra tjetra. Janë 4200 delegatë, pra shumica e Kuvendit që kërkojnë mbledhjen e saj. Ofrova zgjedhje kompromisi që palët të vinin dhe të bënin atë që kanë kërkuar deri dje, verifikimin e formularëve dhe firmave. Kjo nuk u pranua. U kalua në një propozim tjetër për një kuvend tjetër pas një jave që ta them troç, më shumë se sa ka thënë Artan Fuga, do të jetë antimiting nuk di çfarë emri ti vë. Për mua vlerat e kësaj partie sot janë vënë në diskutim nga kjo Kryesi që duhet të ishte aty për të mbrojtur demokratët. Sot janë përbuzur demokratët për interesat e dikujt që guxoi sot të thotë, nuk e kam për kryetarin, por dy nënkryetarët sot patën guximin të thonë hapur edhe po u shkatërrua PD, madje edhe thanë mirë se të vijë shkatërrimi i partisë nëse është e nevojshme. Pse? Që të mbajnë zyrën e tyre dhe karrigen në këtë seli. Pra, le të shkatërrohet PD që këta të mbajnë karrige bosh aty që nuk i hyn punë askujt”, tha Paloka.
