Ish-prokurori i Krimeve të Rënda dhe ish-anëtari i Gjykatës Kushtetuese, Besnik Muçi, ka komentuar mbrëmjen e kësaj të mërkure në emisionin “Opinion” në Tv Klan, situatën pas kërkesës së Prokurorisë së Posaçme kundër Korrupsionit dhe Krimit të Organizuar (SPAK) ndaj Kuvendit, për heqjen e imunitetit për zëvendëskryeministren Belinda Ballukun.
I pyetur nga gazetari Blendi Fevziu nëse është i përligjur SPAK në këtë kërkesë, Muçi u përgjigj: “Padiskutim po. Është duke ushtruar thjesht funksionin e vet kushtetues, hetimin e çështjes penale.”
Pyetja tjetër që iu drejtua si ekspert i ligjit ishte nëse ai shikon një përplasje mes mazhorancës dhe SPAK-ut për këtë çështje, bazuar në faktin që SPAK ka shtuar 7 akte të reja penale kundër ministres së Infrastrukturës dhe Energjisë. Por Muçi gjykon se këtu nuk sheh asnjë përplasje.
“Së pari dua të them që SPAK është në të drejtën e saj kushtetuese për të kërkuar heqjen e imunitetit zonjës Balluku, për caktimin e masës së sigurisë arrest me burg apo arrest në shtëpi, sipas gjykimit të saj. Pra, Kushtetuta ta lejon, Kodi i procedurës penale neni 288 ia lejon, që në rast se është duke hetuar një person me imunitet, deputet në këtë rast dhe për të cilin ka dyshime për kryerjen e veprës penale, ndodhi në kushtet e kriterit të caktimit të masës së sigurimit, të kërkojë heqjen e imunitetit në Kuvendit dhe atë ka bërë. Është e drejta Kushtetuese. Pyetja tjetër ishte a ka përplasje? PËr mua nga pikëpamja ligjore nuk ka asnjë përplasje. Secili institucion është në pozicionin e vet kushtetues, Kuvendi është në pozicionin e vet kushtetues, i cili do shqyrtojë brenda tagrave të tij kushtetues, ka një diskutim brenda hapësirës së ushtrimit të kuvendit, të kërkesës për heqjen e imunitetit, por do të shqyrtojë heqjen e imunitetit, ka edhe praktika Shqipëria në këtë rast, dhe do të vazhdojë hetimi.”, tha Muçi.
Pas vijimit të diskutimeve në studio, Muçi deklaroi se me siguri zëvendëskryeministrja Belinda Balluku, duhet të jetë përgjuar përmes metodave speciale, që përfshijnë edhe përgjime në ambiente private, nga ana e hetuesve të SPAK-ut.
“Nxjerra e këtyre detajeve të dosjes janë gjëra të ndryshme me gjërat që flasim ne, pozicionet kushtetuese të secilit institucion dhe taktikën e mënyrën se si vepron secili institucion. Prokuroria ka zgjedhur të veprojë në këtë mënyrë dhe me çkam parë sot, bile besoj është i vërtetë ky paragrafi që keni paraqitur, provohet që gjatë veprimeve hetimore, zonja Balluku, ka tentuar të prishë provat duke ushtruar presion dhe këtu është shprehur qartë, në formë ndikuese ndaj personit të pyetur. Dhe Prokuroria thotë qartë që kjo ka rezultuar nga përdorimi i metodave speciale të hetimit. Pra përdorimi i vëzhgimit, i përgjimit, përgjimit të telefonave, përgjimit ambiental, vëzhgimit ambiental. Padiskutim. E ka ligji! Fotografi, filmim, dhe përgjim në ambientet private, përgjim telefonash, përgjim bisedash… E ka ligji dhe besoj duhet ti ketë përdorur këto prokuroria këto metoda speciale në hetim.”, tha Muçi.
