Sekretari i Përgjithshëm i Partisë Demokratike, Gazment Bardhi ka shkuar paraditen e sotme në Prokurorinë e Tiranës. Ai është thirrur në organin e akuzës për padinë që Partia Demokratike ka bërë ndaj ministrit të Brendshëm Sandër Lleshaj dhe policisë për përdorimin e gazit lotsjellës në protestat e opozitës.
Dy ditë më parë, Prokuroria e Tiranës regjistroi kallëzimin penal të bërë nga PD më 18 Mars, ndaj Lleshajt dhe Policisë së Shtetit. Sipas selisë blu, Policia e Shtetit ka shpërdoruar detyrën në protestat e zhvilluara nga opozita, duke thënë se përdorimi i gazit lotsjellës dhe hedhja e ujit me presion ndaj protestuesve është bërë në shkelje të ligjit dhe janë tejkaluar kompetencat.
“Isha për të dhënë sqarime për padinë e PD-së ndaj Ministrit të Brendshëm dhe funksionarëve të tjerë të policisë. Kam dhënë faktet dhe provat e disponuara nga PD për veprimet e kundra-ligjshme për drejtuesit dhe punonjësit e policisë së shtetit kanë sulmuar qytetarët, duke i ndaluar në ushtrimin e të drejtës së protestës. Prokuroria në bazë të videove në media mund ta niste vetë hetimin, gjë që nuk ka ndodhur. I bëj thirrje Prokurorisë, të mos bëhet shtojnë e Policisë së Shtetit. Nuk është një organ në varësinë e Ministrit të Brendshëm, Prokuroria duhet të ushtrojë përgjegjësitë e veta. Ka 40 qytetarë që janë në burg pa asnjë provë. Nuk ka asnjë pamje filmike se kanë kryer veprime të dhunshme. E keni dëgjuar se Ministri i Brendshëm protestën e quan ngjarje kriminale, ndërsa vjedhjen në aeroport si incident. Apeli im është për gjyqtarët dhe prokurorët, nuk kanë për ta kaluar vettingun nëse i shërbejnë qeverisë, fundi i prokurorëve dhe gjyqtarëve që i shërbejnë në mënyrë të verbër qeverisë kriminale, do të jetë i njëjtë me qeverinë kriminale”, deklaroi Gazment Bardhi.
Sekretari i Përgjithshëm i PD-së, hodhi akuza të forta ndaj ministrit të Brendshëm, mbi deklaratat e tij në lidhje me protestën e fundit të opozitës.
“Ministri i Brendshëm është mbetje e komunizmit, që e quan protestën si “puç kushtetues”. Nuk do të ketë asnjë ministër, asnjë drejtues policie, prokuror apo gjyqtar që t’i mohojnë të drejtën e protestës qytetarëve. Vetëm për një mbetje komunizmi si Sandër Lleshaj protesta është “puç kushtetues””./Opinion.al
