Partia Demokratike ka akuzuar sot Kryeministrin Edi Rama se i ka dhënë favore të paligjshme mikut të tij Adi Dule, duke mos derdhur asnjë lek në Tatime. Emri i Adi Dules u përmend nga vetë Kryeministri, kur ky i fundit u vendos në shenjestër të sulmit për oxhakun e shtrenjtë. Kujtojmë se Rama deklaroi se videoja e spotit të “Xing me Ermalin” nuk ishte bërë në shtëpinë e tij, por në studion e mikut qeramist Adi Dule, ku shkon për të ushtruar pasionin për pikturën. Këtu nisën dhe polemikat pasi oxhaku në fjalë sipas opozitës dhe medias, kushton 18 mijë euro.
Sot, Partia Demokratike ka publikuar të dhëna nga Tatimet ku rezulton se Dule ka hapur biznes por nuk ka kryer asnjë transaksion për vite me radhë.
“Në librin e tatimeve, miku i kryeministrit, Adrian Dule, figuron si një person me zero transaksione financiare. Nga historiku i të dyja aktiviteteve që ka krijuar, rezulton se ai nuk ka shitur asnjë punim të tij, duke mos i paguar shtetit asnjë qindarkë në tatime”, u shpreh zëdhënësja e PD, Ina Zhupa.
Më tej ajo argumentoi se “Historiku tatimor provon se shoqëria “AD” e mikut të kryeministrit, ka shpallur falimentim në vitin 2012, duke patur të deklaruar zero hyrje dalje ndër vite. Miku i kryeministrit, që mori përsipër pronësinë e oxhakut 18 mijë euro, rezulton se, i regjistruar si person juridik me emrin “Aramika Studio” në vitin 2017, sërish është i deklaruar me zero fitim.
Me deklarimet e tij në tatime, miku i kryeministrit nuk justifikon dot as shpenzimet për të paguar qeranë e studios, jo më të ketë aq para sa për
të blerë oxhakun e famshëm 18 mijë euro me të cilin u shfaq Edi Rama”.
Zëdhënësja e PD, vijoi akuzat ndaj Kryeministrit se ka urdhëruar Tatimet të qëndrojnë larg studios ku ai ushtron aktivitetin e tij privat.
