Çdo vit, publiku duket se është i interesuar për çdo gjë që ka të bëjë me ceremoninë Oscar, përveçse për vetë ceremoninë.
“Oscar” zhvillohet sonte në mbrëmje, por edhe pse shumica prej nesh duam të zbulojmë se kush është aktorja më e mirë ose fotografia më e mirë, shikueshmëria e ceremonisë vitin e shkuar ishte më e ulët se kurrë më parë. Vitin e kaluar, audienca e ceremonisë ishte më e ulta në historinë e Oscarëve, mesatarisht 26.5 milionë shikues, nga 32.9 milionë në vitin 2017.
Rritja e konkurrencës nga shërbimet e transmetimit me siguri do të ketë luajtur një rol por gjithashtu ka gjasa që të ketë ndikuar dhe lodhja e audiencës nga transmetimi 3 orë e gjysmë. Prej vitesh televizioni dhe rrjetet paguajnë një pasuri për Oscarët dhe si rezultat ata presin një shfaqje më të plotë. Kjo do të thotë jo vetëm dhënien e çmimeve por dhe elemente të performancës, duke përfshirë këngën, vallëzimin dhe komedinë. Por, duke i shtuar të gjitha këto elemente në 24 kategori, transmetimi televiziv bëhet tepër i gjatë dhe i lodhshëm për disa shikues.
Rrjedhimisht, Akademia ka tentuar këtë vit për të sjellë disa ndryshime në përpjekje për të mbajtur audiencën në tension, më së shumti duke shkurtuar gjatësinë e transmetimit deri në tre orë.
Cilat ishin propozimet?
Sipas “BBC” Akademia fillimisht tha se fituesit e katër kategorive do të shpalleshin gjatë reklamave, me pikat kryesore të redaktuara duke u shfaqur në pjesën e fundit të transmetimit. Por sipas Feinburg kjo do të ishte me të vërtetë e rrezikshme.
“Gjatë reklamave, kur të ftuarit në ceremoni e dinë se nuk janë live, sillen përreth dhe bisedojnë me njerëzit, shkojnë në banjo, janë më të zhurmshëm dhe kjo mund të jetë mosrespektuese ndaj fituesve të cilët janë duke marrë çmimet e tyre gjatë asaj kohe. ”
Disa figura të rëndësishme në industrinë e filmit, duke përfshirë Spike Lee, Seth Rogen dhe Martin Scorsese, gjithashtu kundërshtuan ndryshimin. Kështu që, Akademia rivendosi kategoritë, dhe u tha anëtarëve të saj javën e kaluar: “Të gjitha çmimet do të paraqiten pa redaktime, në formatin tonë tradicional”.
Ndërkohë që pas dorëheqjes së Kevin Hart, Akademia konfirmoi se këtë vit do të kishte disa të famshëm duke prezantuar kategori individuale. Jennifer Lopez, Whoopi Goldberg, Daniel Craig, Awkwafina dhe Tina Fey janë ndër ata me të cilët Akademia shpreson se do t’i mbajë shikuesit në shtëpi të angazhuar para televizorit. Kjo do të thotë që monologu hapës do të anashkalohet, duke kursyer edhe kohë, por gjithsesi nuk ka gjasa që ceremonia do të fillojë direkt me dhënien e së çmimeve.
Në drekën vjetore të Akademisë muajin e kaluar, të nominuarve u është thënë se do të kishin 90 sekonda nga koha kur emri i tyre do të thuhet , për të përfunduar fjalimin e fituesit.
Në planin e tij me dhjetë pika “për të shpëtuar Oscarët” vitin e kaluar, Piers Morgan sugjeroi që Akademia duhet të “përgjysmojë performancat muzikore në dhe të shpëtojë nga kategoria e këngëve më të mira”. Por Akademia konfirmoi para disa ditësh se nuk do të priste asnjë prej këngëve kështu që kandidatët e këtij viti, përfshirë Lady Gagën, do të performojnë normalisht.
Një tjetër propozim i Akademisë është shtimi i një kategorie që lidhet direkt me popullaritetin dhe të ardhurat e filmave, por kjo ende nuk është vendosur dhe ka akoma vend për diskutim, pasi mund të kemi një përballje të kritikës me preferencat popullare dhe me “Oscar” mund të vlerësohen dhe prodhime kinematografike që nuk kanë nivelin e duhur./E.M
