Ministrja e Mbrojtjes Olta Xhaçka i është përgjigjur Presidentit Ilir Meta, duke thënë se nuk ka asnjë arsye përse duhej njoftuar Presidenti i Republikës për angazhimin e Policisë Ushtarake dhe forcave të Batalionit të Forcave të Armatosura.
“Nuk ka pse njoftohet Presidenti i Republikës, nuk po shkojmë në luftë, por po garantojmë sigurinë me Policinë Ushtarake të një objekti të rëndësisë së veçantë, siguria e të cilit është cenuar. Aeroporti i Rinasit është edhe infrastrukturë ushtarake. Nuk po shkojmë në luftë që do t’i kërkonim aprovim parlamentit. Nuk po diskutojmë dislokim trupash, por marrje të masave të sigurisë për perimetrin e aeroportit nga Policia Ushtarake. Gjysma e pistës së aeroportit është e ushtrisë, e forcës ajrore dhe gjysma tjetër për përdorim civil. Patrullime në perimetrin e sigurisë jashtë aeroportit dhe jo brenda tij. Jemi të detyruar të garantojmë perimetrin e sigurisë së aeroportit përmes Policisë Ushtarake e cila e ka për detyrë këtë dhe nuk është nevoja të marrim aprovim në Parlament”, ka thënë Xhaçka.
Më herët ishte presidenti Ilir Meta i cili i kërkoi “llogari” shefit të Shtabit të Përgjithshëm të FA, Bardhyl Kollçaku për bazën ligjore në dërgimin e FA në aeroportin e Rinasit.
Edhe ish-Presidenti Bujar Nishani e quajti një veprim të jashtëligjshëm dhe anti-kushtetues, duke paralajmëruar Presidentin Ilir Meta se po bëhet hapi i parë drejt instalimit të juntës ushtarake./Opinion.al
