Shefi Evropian i Organizatës Botërore të Shëndetësisë ka deklaruar se deri më tani 95 përqind e 23.5 milionë dozave të vaksinave kundër COVID-19 të shpërndara në të gjithë botën, janë përdorur në vetëm 10 vende.
Drejtori i OBSH-së për Evropën, Hans Kluge e bëri deklaratën e tij gjatë një konference për mediat ditën e enjte në Kopenhagen. Kluge shtoi se për të ndalur në mënyrë efektive COVID-19, vaksinat duhet të ndahen në mënyrë të barabartë, mes shteteve me të pasura dhe atyre të varfra të botës.
Në përpjekjen globale për t’i dhënë fund pandemisë, Kluge tha, “kjo duhet bërë së bashku, ne thjesht nuk mund të lëmë asnjë vend, asnjë komunitet prapa.” OBSH-ja dhe partnerët e saj të nismës COVAX, shtoi ai, po bëjnë “përpjekje të mëdha për të dërguar vaksina në çdo vend; ne kemi nevojë që çdo vend i aftë të kontribuojë, duke dhuruar dhe mbështetur qasjen e barabartë tek vaksina”.
Specialisti i OBSH-së për shëndetin publik, Ihor Perehinets ishte gjithashtu i pranishëm në konferencën e shtypit përkrah zotit Kluge dhe shprehu besimin se ata që kanë nevojë për vaksina do t’i marrin ato.
“Disponueshmëria e vaksinave do të rritet me një shpejtësi të madhe në të gjitha vendet dhe ne do të arrijmë nivelin e nevojshëm të imunizimit për të mbrojtur jo vetëm grupet e rrezikuara, por të gjithë popullsinë e Evropës dhe botës”, tha ai. Kjo është çëshje kohe, shtoi ai.
Kluge tha se masat e shëndetit publik të hartuara për të luftuar pandeminë duhet të bazohen në ato që ai i quajti “vlerat thelbësore” të njerëzimit: solidaritetin, barazinë dhe drejtësinë sociale.
“Kjo është mënyra e vetme për të dalë nga kjo periudhë pasigurie sepse askush nuk është i sigurt derisa të gjithë të jenë të sigurt”, tha ai.
