Komisionii Qendror i Zgjedhjeve do të mblidhet ditën e nesërme për të vendosur për mandatin e dy deputetëve Gledion Rehovica të LSI-së dhe Aqif Rakipi të PDIU-së, për të cilët Prokuroria e Përgjithshme ka kërkuar në ditët e fundit të vitit 2017, ndërprerjen e mandatit, pasi sipas organit të akuzës rezultojnë se janë subjekt i ligjit të dekriminalizimit.
Të dy deputetët në muajin shkurt kanë dorëzuar shenjat e gishtave të cilat u janë dhënë Interpolit, nga ku rezultuar sipas Interpol Romës, se deputeti i PDIU-së, Aqif Rakipi, është proceduar për vjedhje me emrin Skënder Ejylbegaj. Vjedhja ka ndodhur në 03.11.1998, kohë kur deputeti ka deklaruar në formularin e dekriminalizimit se ka qenë emigrant në Itali.
Po kështu sipas Interpol Romës, deputeti i LSI-së, Gledion Rehovica është proceduar për vjedhje dyqani me emrin Kusta Mina në 27.02.1999, kohë kur vetë deputeti ka deklaruar se jetonte në Itali si student.
Çka të dy deputetët nuk i kanë deklaruar ndalimet në formular, po kështu as përdorimin e emrave të tjerë, çka sipas ligjit të dekriminalizimit përbën arsye për ndërprerje të menjëhershme mandati.
Po kështu KQZ do të mblidhet për të marrë në shqyrtim 5 vendime të prokurorisë, dy që kërkojnë heqje mandati për Rehovicën dhe Rakipin, dhe tre të tjera që arrijnë në konkluzionin se zyrtarët nuk preken nga dekriminalizimi.
Përkatësisht për ish deputetët Omer Mamo e Mhill Fufi si dhe kryebashkiaku i Pogradecit, Eduard Kapri.
