Një 40-vjeçar nga Lepenica e Vlorës ka humbur kontaktet me familjarët e tij prej 4 ditësh. Sipas informacioneve, personi i humbur quhet Ermal Ngucaj, ndërsa denoncimi për zhdukjen e tij është bërë nga familjarët.
Ndërkohë, makina e 40-vjeçarit është gjetur në fshatin Mavrovë të Vlorës. Familja dyshon për rrëmbimin e tij. Dyshimet paraprake të policisë lidhen me të kaluarën e këtij personi, i cili rezulton me precedentë penal. Raportohet se Ngucaj ka dalë nga burgu një vit më parë.
Në fakt një vit më parë 40-vjeçari, u përfshi në një konflikt për një gurore në Lepenicë. Ai u akuzua nga një djalë 19-vjeçar nga fshati Kotë e Vlorës, Paolo Durmishaj se e kishte aksidentuar me makinë, ku si pasojë i riu mbeti i plagosur.
Paulo Durmishaj asokohe rrëfeu se konflikti për biznesin e gurores vazhdonte prej 4 vitesh.
Në atë kohë, Durmishaj pretendonte se 40-vjeçari e kishte ndjekur me një mjet “Benz” me ngjyrë të bardhë, duke shtuar se ndoshta pronari i firmës e kishte dërguar për ta trembur.
