Policia ka vënë në pranga një person dhe ka shpallur në kërkim katër të tjerë për ngjarjen e ndodhur mbrëmjen e 17 gushtit në Patos ku mbeti i plagosur një person.
Sipas njoftimit të policisë, 5 të rinjtë të moshave nga 23 në 32 vjeç, në bashkëpunim me njëri tjetrin, kanë tentuar të rrëmbejnë me forcë dhe më pas e kanë qëlluar me armë zjarri 31 vjeçarin me iniciale K. S., i cili ka mbetur i plagosur dhe aktualisht ndodhet në Spitalin Rajonal Fier, nën kujdesin e mjekëve.
Nga zbardhja e kësaj ngjarjeje, është arrestuar Xh. S., 24 vjeç, banues në Patos.
Janë shpallur në kërkim dhe po punohet për kapjen e: E. S., 28 vjeç; V. S., 23 vjeç; A. S., 24 vjeç dhe K. S., 32 vjeç, të katërt banues në Patos.
Për këtë ngjarje, janë sekuestruar në cilësinë e provës materiale 5 gëzhoja pistolete, si edhe 4 automjete të autorëve.
Materialet i kaluan Prokurorisë pranë Gjykatës së Shkallës së Parë Fier për veprat penale “Vrasja me paramendim e mbetur në tentativë” , “Rrëmbimi ose mbajtja peng e personit e mbetur në tentativë” të kryera në bashkëpunim dhe “Armëmbajtja pa leje”./ Opinion.al
