Kryeministri Edi Rama është shprehur se vendimi që Shqipëria të ulet në konferencën e parë ndërqeveritare me BE varet nga dinamikat e brendshme mes vendeve dhe jo nga ajo që bën apo jo Shqipëria.
Konferenca e parë ndërqeveritare shënon nisjen e procesit të çeljes së negociatave për të cilin u ra parimisht dakord në muajin Mars. Megjithatë vendet e BE ranë dakord që Shqipëria duhet të përmbushte disa kushte para se të ulej në tryezë me ta.
Por kryeministri Rama nuk e sheh me rëndësi kohën kur do të ndodhë konferenca e parë pasi sipas tij ajo është një vendimmarrja “që varet shumë më tepër nga dinamikat e brendshme, se sa nga çfarë bëjmë ne”.
“Këtë do ta shohim në varësi të vendimit që do të marrë Këshilli Europian. Por ajo që është e padyshimtë, është që ne po ecim në mënyrë intensive në hedhjen e hapave të mëtejshëm dhe, pavarësisht se çfarë do të vendosë Këshilli Europian, që ne e dimë që është një vendimmarrje që varet shumë më tepër nga dinamikat e brendshme, se sa nga çfarë bëjmë ne, ne do të vazhdojmë me vullnet dhe me durim. Dhe shpresoj që Konferenca do të ndodhë në fund të këtij viti, dhe nëse nuk ndodh në fund të këtij viti, ajo do të ndodhë vitin e ardhshëm dhe kjo është thjesht një çështje, që e përsëris ka të bëjë me dinamikat e brendshme në Bashkimin Europian.”, tha ai në një intervistë për Deutche Welle./ Opinion.al
