Të ndodhur në vijën e parë të luftës, një pjesë e ushtarëve ukrainas janë siguruar tashmë, që sido që të shkojë fati i tyre, të mund të lënë pasardhës.
Sipas New York Times, një pjesë e ushtarëve kanë bashkëpunuar me klinika speciale për të ngrirë spermën në mënyrë që partneret e tyre të mund të sjellin në jetë pasardhës të tyre edhe nëse ata japin jetën duke luftuar armikun.
I tillë është rasti i Vitaly Kyrkach-Antonenko. Kur gruaja e tij Nataliya ishte tre muajshe shtatzënë me fëmijën e tyre të parë, ai zgjodhi të luftonte dhe ndërroi jetë në fushën e betejës.
Nataliya pretendon se nuk do të heqë dorë nga ëndrra e tyre pavarësisht se është në zi të thellë. Ajo dëshiron t’i japë vëllezër e motra fëmijës të saj.
Ashtu si qindra ushtarë të tjerë ukrainas, Vitaly ngriu spermën e tij përpara se të kthehej në betejë me shpresën se nëse nuk do të kthehej në shtëpi, ai ende mund të transmetonte gjenet e tij, raportoi The Neë York Times.
Vendimi për ruajtjen e spermës është sa emocional aq dhe patriotik për shumë ukrainas. Mbështet meshkujt që dëshirojnë të lënë diçka nga vetja nëse vdesin dhe i jep ngushëllim partnereve të tyre.
Në një vend tani të famshëm për frymën e tij të rezistencës, është gjithashtu një arsye më shumë për të luftuar. Ai e lë të hapur mundësinë, të paktën, për të ruajtur linjat e gjakut ukrainas, edhe pse Kremlini këmbëngul se shtetësia ukrainase, dhe si rrjedhim ukrainasit si një popull më vete, janë një trillim.
Ideja për t’i rezistuar fshirjes si komb ka fituar mjaft tërheqje sa që aktualisht në Parlament po debatohet një projektligj që lejon ushtarët të ngrijnë spermën e tyre me shpenzime shtetërore.
“Është vazhdim i grupit tonë të gjeneve,” tha Oksana Dmytriieva, ligjvënëse ukrainase që shkroi projektligjin, i cili tashmë ka hequr një pengesë drejt kalimit në një votim fillestar.
Klinika të shumta tashmë kanë filluar të ofrojnë shërbimin falas dhe me paratë e tyre. Dhe znj. Kyrkach-Antonenko është shfaqur pa dashje si një model për kauzën.
