Policia e Fierit ka dhënë versionin e saj zyrtar për ngjarjen e ndodhur në Fier ku mbetën të plagosur tre persona. Sipas policisë në Levan ka patur një konflikt mes dy familjeve nga i cili kanë mbetur të dëmtuar me sende të forta dy shtetas me iniciale përkatësisht G.ZH dhe D.ZH si dhe kanë mbetur të plagosur me mjete prerëse K.L dhe E.M.
Policia konfirmon gjithashtu në njoftimin e saj se në urgjencën e spitalit “një prej shoqërueseve të të dëmtuarve i ka marrë armën e zjarrit nga brezi punonjësit të policisë, i cili po ndihmonte për të futur të plagosurit në Urgjencë dhe ka plagosur me armë zjarri një prej familjarëve të palës tjetër, shtetasin A.ZH.”
Pas këtij episodi në vendngjarje kanë mbërritur forca të tjera policie të cillat kanë bërë të mundur ndalimin dhe shoqërimin në komisariat të dy shtetasve E.B dhe D.B.
Sipas policisë i përfshirë në këtë ngjarje është edhe një shtetas i tretë i cili është në kërkim nga forcat e policisë dhe FNSH.
Drejtori i përgjithshëm i policisë Ardi Veliu ka ngritur një grup të posacëm për hetimin e kësaj ngjarje me Specialistë të Hetimit të Krimeve të Rënda në Departamentin e Policisë Kriminale.
Njëkohësisht me urdhër të Drejtorit të Përgjithshëm të Policisë së Shtetit në vendngjarje kanë shkuar edhe specialistët e Drejtorisë së Standarteve Profesionale në Polici, për të verifikuar veprimet e punonjësve që ishin në momentet e para në Urgjencën e spitalit.
Nën drejtimin e Prokurorisë së Rrethit Gjyqësor Fier po vijon puna për zbardhjen e plotë të rrethanave të ngjarjes, motivit të konfliktit si dhe vënien para përgjegjësisë ligjore të personave përgjegjës. /Opinion.al
