Presidenti i vendit Ilir Meta ka mbërritur këtë pasdite në Vlorë, ku la të kuptohet se do të qëndrojë aty për të ndjekur procesin e numërimit të votave.
“E kishim lënë këtë takim në Vlorë dhe do të vazhdojmë të jemi këtu, por dhe kudo tjetër ku të jetë e nevojshme, për të dhënë mesazhin se duhet të vazhdojmë edhe në minutat në vijim të merrni pjesë në zgjedhje. Kjo është një ditë historike, se jemi njohur si vend problematik dhe kjo ka mbajtur peng negociatat, ndaj dhe është e rëndësishme që kjo ditë e mrekullueshme të vazhdojë kështu, derisa të mbyllet gjithë procesi i votimit”, u shpreh Presidenti.
Por ndërkohë, duket se zoti Meta ka ndryshuar qëndrim, lidhur me dekretimin e Kryeministrit Rama në rast të një fitoreje nga ana e tij. I pyetur në Vlorë mbi këtë argument, ai u shpreh: “Për mua është e rëndësishme të fitojë Shipëria. Dhe Shqipëria fiton vetëm duke shkëlqyer sot”.
Kujtojmë se mbrëmjen e së premtes, në një intervistë televizive, Meta tha se do të dorëhiqej nëse Rama fitonte dhe nuk do ta dekretonte emrin e tij.
“Unë po bëj cdo gjë që zgjedhjet të jenë sa më të ndershme, deri tani janë cënuar rëndë vetëm nga Edi Rama, askush tjetër, unë apeloj nga ky moment, sot në 12:00 deri në zgjedhje të gjithë të reflektojnë, që shqiptarët të shprehin vullnetin e tyre të dielën, që të kemi një proces votimi të lirë dhe numërimi me integritet. Unë nuk pres zgjedhje daneze, aq më tepër nga një kryeministër si Rama. Nëse fiton në mënyrë demokratike, unë atij firmë për kryeministër nuk i jap, por një dorëheqje ja çoj, merre bëje edhe presidentin ti. Unë po ta jap edhe presidentin, unë po dal në bulevard, unë e respektoj vendimin e popullit. Nëse populli i jep 71 mandate unë dal në bulevard dhe iki, çfarë do të bëj unë një vit më shumë në Presidencë, cfarë do të bëj?” tha presidenti Meta./Opinion.al
