Në deklaratën e pasurisë në vitin 2003, rezulton se prokurori Arian Ndoja nuk ka banesë ndërsa në deklarimin e vitit 2016 ai ka në pronësi 23 apartamente, dy lokale, disa makina, bodrume dhe garazhde.
Prokurori që u përfshi në atentatin e pak ditëve më parë në mbikalimin e Shkozetit rezulton si pronar i vetëm një makine benz tip ‘190’ me vlerë 200 mijë lekë në vitin 2003 dhe ka deklaruar gjithashtu pagën e tij si prokuror dhe të bashkëshortes si juriste. Të dyja pagat neto nuk e kalojnë vlerën e 100 mijë lekëve (89,500 në muaj).
Në vit më vonë Ndoja largohet nga detyra si prokuror dhe deklaron 500 mijë lekë të ardhura si prokuror dhe 28 mijë euro të ardhura si avokat.
Në vitin 2008 ai kthehet në detyrën e prokurorit por këtu ndodh edhe ndryshimi i parë i madh i pasurisë së tij. Ai deklaron dy lokale në vlerat 114 600 euro dhe 159 520 euro, dy apartamente 117 m2 dhe 92 m2 në vlerat 65 mijë euro dhe 2 000 000 lekë si dhe dy makina, njëra me vlerë 34 mijë euro. Megjithatë prokurori nuk ka dhënë informacion për burimin e këtyre të ardhurave që përllogariten rreth 48 milionë lekë të krijuara brenda 4 viteve. E vetmja pagë që ai ka deklaruar është ajo nga universiteti Kristal, 750 mijë lekë në vit.
Në vitin 2013, bashkëshortes së Arian Ndojës, Elderina Frrok Ndoja, i dhurojnë 6 prona në Durrës me sipërfaqe gjithsej 196 211 metra katrorë. Ajo kishte përfaqësuar një shtetas për të përftuar një sipërfaqe 45 mijë m2 në Gjirin e Lalëzit. Kjo ishte sipërfaqja ku biznesmeni libanez Faadi Mitri do të investonte miliona euro por që u tërhoq pas një sulmi ku u rrah barbarisht. Pasi kjo pronë u përftua nga shtetasi Pal Selçuni, 74 vjeçar, iu shit familjes Muharremi.
Një muaji më vonë Elderina Frrok Ndoja deklaron se i ka dhuruar një personi dy pronat e para që i kishin dhuruar asaj, pronën me sipërfaqe 79 434 metra katrorë dhe 112 277 metra katrorë.
Në vitin 2014, prokurori Ndoja deklaron 50 % të një trualli në Shëngjin me sipërfaqe 2008 m2 të përftuar me shkëmbim por pa deklaruar pasurinë të cilën ka shkëmbyer. Në këtë vit në deklarimin e tij ka një kontratë sipërmarrjeje e cila zbulohet vetëm dy vite më vonë.
Në vitin 2016 rezulton se në bazë të një kontrate sipërmarrjeje me kompaninë ‘Rafaelo 2002’, ku ka punuar më parë bashkëshortja e prokurorit Arian Ndoja ka përfituar në Shëngjin 21 apartamente dhe tre bodrume. Në deklarimin e këtij viti prokurori Ndoja rezulton si ka dhënë një hua 159 520 euro një shtetasi, 88 mijë euro një tjetër shtetasi 6 mijë dollarë cash, 10 149 808 lekë në llogari bankare, 1 199 440 lekë të ardhura nga paga e tij, 1 466 922 lekë nga paga e bashkëshortes dhe një automjet në emër të bashkëshortes me vlerë 1 milion e 400 mijë lekë. /Opinion.al
