Kreu i Partisë Demokratike Lulzim Basha ka prezantuar sot programin e kësaj force politike për të përndjekurit politikë. Në fjalën e tij, Basha ka premtuar ndër të tjera:
- Dëmshpërblim të plotë për të përndjekurit brenda mandatit
- Ngritjen e Muzeutë të Viktimave të Komunizmit
- Ligj për lustracionin si kërkesë falje për 30 vite
“Partia Demokratike ka marrë angazhime konkrete dhe të zbatueshme në raport me të përndjekurit politikë të regjimit komunist. Ne zotohemi që brenda mandatit të parë të përfundojmë pagesat për familjet e persekutuara nga regjimi komunist. Atyre iu është bërë një dëm i pakthyeshëm në jetët e tyre dhe sa më shumë që e vonojmë këtë shpagim të vogël, aq më shumë rëndon mbi ne, dëmi që i është shkaktuar… të persekutuarit … sot e kësaj dite nuk kanë një gur varri ku të kujtojnë prindërit apo të afërmit e tyre… angazhohemi që në ditët e para në qeveri, të krijojmë instrumentin dhe fondin për gjetjen e trupave të njerëzve të pushkatuar”, tha Basha duke shtuar se qeveria e tij do të ofrojë edhe bursa studimi dhe kredi të buta për banesa, çifteve të reja nga pasardhësit e të përndjekurve politikë.
“Qeveria e ardhshme do të ofrojë bursa studimi dhe kredi të buta për banesa, çifteve të reja nga pasardhësit e të përndjekurve politikë. Ne do të subvencionojmë shërbimet shëndetësore dhe rrisim pensionet e të përndjekurve nga komunizmi, … që të burgosurve politikë t’ju jepen 100 Euro shtesë mbi pensionet e tyre. Atyre që kanë vuajtur punën skllavëruese dhe torturat e kolonive ndëshkimore në minierat e Spaçit e në Qafë të Barit. Do ti mundësojmë një pension si të minatorëve për ato vite që kanë punuar aty”, tha ndër të tjera Basha.
Ai shtoi se do të dënohen të gjitha simbolet e komunizmit, ndërsa në shkolla do të ketë një edukim të veçantë për këtë periudhë.
“ Asnjë xhelat i djeshëm nuk mund të jetë një shenjtor i sotëm, ndaj angazhohem për miratimin e një ligji për pastrimin e figurës që nuk do të jetë vetëm një distancim njëherë e mirë nga diktatura gjakatare 50-vjecare, por edhe një apologji për 30 vite të munguara”, tha Basha duke folur për angazhimin e tij për një ligj të lustracionit./Opinion.al
