Presidenti gjerman, Frank-Walter Steinmeier, nguli këmbë gjatë një takimi me kryeministrin izraelit Benjamin Netanyahu për një zgjidhje paqësore për luftën në Gazë. Ai theksoi nevojën për të “treguar perspektiva politike për t’i dhënë fund luftës”, tha një zëdhënëse. Steinmeier theksoi gjithashtu nevojën për të lejuar që ndihmat humanitare për popullsinë të arrijnë në Gazë.
Menjëherë pas takimit të presidentit gjerman me Netanyahun në Izraelpati një alarm për shkak të një sulmi me raketa nga Rripi i Gazës . Presidenti gjerman dhe një pjesë e delegacionit u dërguan në një bunker të sigurt ndaj sulmeve ajrore.
Netanyahu planifikon ofensivë të re
Kryeministri izraelit Benjamin Netanjahu njoftoi se ditët në vijim do të ketë një ofensivë të re për të shtypur Hamasin islamist në Rripin e Gazës. Në një takim me rezervistë izraelitë, kryeministri izraelit tha: “Shkatërrimi i Hamasit dhe lirimi i të gjithë pengjeve tona – janë një dhe të pandara” Netanjahu deklaroi se “ditët në vijim, ne do të hyjmë me forcë të plotë për të përfunduar fushatën.” Kjo do të thotë mposhtjen e Hamasit.
Në këtë kuadër ushtria izraelite u bëri banorëve të disa zonave në Rripin verior të Gazës thirrje për evakuim. Ky është “paralajmërimi i fundit para sulmit”, shkroi zëdhënësi i ushtrisë Avichay Adraee në shërbimin online X.
Macron kritikon ashpër veprimet e Izraelit në Gazë
Presidenti francez Emmanuel Macron i kritikoi vendimet e reja të kryeministrit izraelit dhe tha në TF1 se “ajo që po bën aktualisht qeveria e Benjamin Netanyahut është e papranueshme”. Ai tha se Izraeli po bllokon ndihmat humanitare nga Franca dhe vende të tjera për popullsinë në Gazë. Kriza humanitare në brezin bregdetar është shkatërrimtare, tha presidenti francez. Nuk ka ujë dhe as ilaçe.
Franca gjithmonë e ka njohur të drejtën e Izraelit për mbrojtje pas masakrës nga Hamasi dhe grupe të tjera terroriste më 7 tetor 2023, por gjithashtu e ka bërë të qartë se zgjidhja nuk qëndron në sulme pa dallim në Rripin e Gazës, tha Macron. DW
