Ka mjaftuar një konferencë për mediat e kreut të PD-së, Lulzim Basha ku ai deklaroi si vendimi për mos çeljen e negociatave është dështim i qeverisë shqiptare, që në rrjet të niste një “dialog” në distancë mes tij dhe kryeministrit Edi Rama.
Pas deklaratës së Bashës, kryeministri Edi Rama publikoi në rrjetet sociale deklaratën e presidentit të Këshillit Europian, Donald Tusk në lidhje me mos hapjen e negociatave me BE, si dhe atë të kreut të PD, Lulzim Basha, i cili shprehet ndryshe nga zyrtari i BE.
Por, pak pas publikimit të postimit të Ramës, ka ardhur reagimi i Bashës. Përmes një postimi në “Twitter”, ai thekson se kryeministri dështoi dhe se fajin po ua hedh të tjerëve. Kreu i PD i ka përmendur problemet në shëndetësi, ekonomi si dhe korrupsionin në vend, ku thekson se i vetmi fajtor është Rama.
“Mjaft me shfajësime personale dhe fajësimin e të tjerëve z. Rama. Të gjithë janë lodhur me justifikimet e tua për dështimet e tua, gjithmonë duke mbrojtur veten, kurrë popullin tënd, asnjëherë gati të pranosh përgjegjësinë tënde. Fakti është, Europa të ka refuzuar.Ti ke dështuar. Kujt do t’ja hedhësh fajin për dështimin me shëndetësinë?Për ekonominë e shkatërruar?Kujt do t’ja hedhësh fajin për qeverinë tënde të korruptuar? Ka ardhur koha të pranosh përgjegjësitë për dështimet e tua. Është mbushur kupa. Europa të ka refuzuar, dhe shqiptarët do të refuzojnë”,-shkruan Basha.
Por Rama nuk e la me kaq dhe postoi disa minuta më vonë deklaratën e kryeministrit italian, Giuseppe Conte, i cili cilëson gabim historik mos çeljen e negociatave. Përbri deklaratës së tij Rama kishte vënë sërish fjalët e kreut të opozitës.
Basha reagoi prapë në Twitter duke iu drejtuar drejtpërdrejtë kryeministrit Rama për të mbajtur përgjegjësi për dështimet e tij.
“Kot fshihesh me lojëra fjalësh. Nuk ka citat në botë ti mbulojë dështimet e tua. Pikë. BE të ka refuzuar ty! Mbaj përgjegjësi” shkruan Basha.
Nga ana tjetër Rama i vazhdoi replikat duke postuar prapë një foto ku ballafaqonte deklaratën e kancelares Merkel dhe të Lulzim Bashës lidhur me vendimin e Këshillit Europian.
Kreu i PD nuk e la pa përgjigje “dialogun” në distancë duke shkruar se opozita mbështet qëndrimin e liderëve të BE por duke cilësuar se megjithëse ata mbështesin Shqipërinë, refuzojnë Ramën.
“Ne mbështesim 100% qëndrimet e liderëve të BE. Shqipëria e meriton hapjen e negociatave. Shqipëria meriton më të mirën. Për fat të keq ka një njeri që e pengon këtë rrugë. Ata duan ta pranojnë Shqipërinë, por në mënyrë të përsëritur ata refuzojnë Ramën.” shkruajti Basha në Twitter. Kësaj radhe duke e shoqëruar me një foto të deklaratave të 4 liderëve europianë, 3 prej të cilave të postuara më parë nga Rama. / Opinion.al E.Xh.
