Bota

Në prapaskenë lëviz fijet, John Bolton njeriu më i rrezikshëm i botës?


               Publikuar në : 14:15 - 20/05/19 |
geliano fataj

Shtetet e Bashkuara të Amerikës janë të përfshirë në tre konflikte të mëdha rreth botës, të cilat rrezikojnë të precipitojnë në luftë. Në sedijen e shoferit të këtij procesi është ulur John Bolton, një nga ithtarët më të mëdhenj të forcës ushtarake amerikane që ka punuar ndonjëherë në Shtëpinë e Bardhë.

Këshilltari 70-vjeçar për çështjet e Sigurisë Kombëtare ka qenë një figurë prezente prej 4 dekadash tashmë në politikën e jashtme të SHBA. Herë jashtë e herë brenda qeverisë, qëndrimi i tij ka qenë gjithmonë kërcënues dhe i prerë për çështjet që i janë vënë përpara.

“Ai beson se kur SHBA udhëheq, bota është më e sigurte dhe më e mirë, jo vetëm për ne por për të gjithë”, thotë Mark Groombridge, ndihmësi i Bolton për 10 vite.

Gjatë presidencës së Obamës, mustaqet e Boltonit do të ishin vazhdimisht të pranishme në tryeza debati, kryesisht në Fox News, nga ku ai do të fshikullonte me kritika administratën e Demokratëve.

Tashmë Bolton duket më i qetë teksa ka arritur majën e establishmentit politik-bërës, ambicie e cila i dukej larg pak kohë më parë. Sipas Julian Borger, Bolton është njeriu që lëviz fijet e politikës së SHBA në tre çështjet e mëdha ndërkombëtare ku ajo është përfshirë. Në rastin e Koresë së Veriut, ishte qëndrimi i tij me kërkesa maksimaliste ndaj Kim Jong-un që i ngriu përsëri marrëdhëniet mes dy vendeve. Një vit përpjekje diplomatike kanë shkuar pothuajse kot tani që Kim duket se ka rinisur testet raketore.

Figura e John Bolton ishte qendrore në mënyrën se si u trajtua çështja e Venezuelës. Ai përfaqësoi zërin e Amerikës në qëndrimin kundra Maduros që mbajti SHBA. Borger shkruan se në prapaskenë Bolton ka porositur Komandën Jugore të SHBA që të planifikojnë një zgjidhje edhe më agresive përsa i përket largimit të Maduros nga pushteti.
Së fundmi, John Bolton duket se qëndron prapa gjendjes që sa vjen e tensionohet mes Iranit dhe SHBA-së. Vendimmarrja e tij për dërgimin e trupave në rajon, megjithëse kjo që shihej me sy të keq nga Teherani, u pa si karshillëk edhe nga vetë zyrtarë të inteligjencës amerikane.

Bolton raportohet se ka mbajtur një takim sekret mbi Iranin në 29 Prill, jo në Shtëpinë e Bardhë por në zyrat e CIA-s. Kjo duket si një djea-vu e kohës kur të njëjtat gjëra i bënte Dick Cheney gjatë kohës së George W Bush.

Bolton u rrit në një familje punëtore Republikane në Baltimore. Eksperienca e tij e parë politike daton në 1964 si vullnetar në fushatën e Barry Goldwqater në Arizona. Ai u shkollua në Universitetin e Yale. Ndryshe nga bashkëmoshatarët e tij në atë kohë ai mbështeti luftën e Vietnamit, por nuk kontribuoi vet në të sepse ju bashkua forcave ushtarake në Maryland.

Karriera e tij vazhdoi si një nga këshilltarët dhe ndihmësit më të mirë të Bushit në Florida e më pas si ndihmës si Dick Cheney.  Sipas njerëzve që kanë punuar me të ai nuk është një njeri i hapur për dialog, por kërkon t’i bëjë gjërat e prera dhe shpesh herë në mënyrë kërcënuese.

Kjo sipas Borger e ka mbajtur pranë Trump për një kohë të gjatë. Gjithsesi pozitat e tij mund të lëkunden kohët e fundit. Qëndrimi që SHBA mbajti në çështjen e Venezuelës duket se nuk solli rezultatet e pritura dhe Presidenti Trump nuk para i pëlqen të dështojë në qëndrimet e tij publike.

Megjthatë, John Bolton duke që ka arritur stadin e një ‘puppet master’ në politikën e jashtme amerikane dhe ndoshta kjo e bën atë njeriun më të rrezikshëm të momentit./ Përkthyer nga The Guardian-Opinion.al

Pas