Ish-ministri i Jashtëm, Ditmir Bushati ka ndarë pikëpamjet e tij lidhur me ecurinë e Shqipërinë në procesin e integrimit europian.
Bushati e ka ndarë video-mesazhin e tij në Facebook, pasi siç thotë ai në Kuvend nuk iu dha fjala për të komentuar atë që ai e quan “momentin më të rëndësishëm politik të vitit.”
Ish-ministri i Jashtëm vlerëson qëndrimin e BE-së që vendosi në mars çeljen e negociatave me Shqipërinë. Ai theksoi se duhet t’i rikthehemi angazhimeve që kemi ndërmarrë vitin e shkuar, për të adresuar të gjitha “detyrat e shtëpisë” që na kanë lënë Vendet Anëtare të BE-së.
Kushtet e vendosura për hapjen në praktikë të negociatave, Bushati nuk e shikon si “motivim për më shumë reforma të qëndrueshme”.
Për të është shumë e rëndësishme të bëjmë hapa para në procesin e integrimit dhe kjo nis duke parë nga vetja si fillim thotë Bushati.
Shqetësimi i tij kryesor janë reformat “pa pronësi” që ndërmerren në vend.
“Sot themi se disa reforma të rëndësishme i bëjmë në bashkautorësi me partnerët ndërkombëtar, por pa pronësi.
Hendeku ynë zhvillimor me BE-në, më shumë sesa ekonomik, i ka rrënjët pikërisht tek mungesa e pronësisë së reformave që janë jetike për një shoqëri demokratike.
Qytetarët e zakonshëm të këtij vendi nuk është se po presin negociatat me Bashkimin Europian në kuptimin klasik të fjalës. Pasi ata e dinë mirë që jeta e tyre nuk do të ndryshojë si me magji të nesërmen e fillimit të negociatave. Ata e dinë gjithashtu po aq mirë që nuk do të negociojmë standardin evropian. Por, ky proces do të duhet të na ndihmojë për arritjen e këtyre standardeve. Për rritjen e mirëqenies, për ndalimin e hemorragjisë demografike dhe për t’i bërë të gjitha fashat e shoqërisë protagoniste të transformimit të Shqipërisë. Ky është testi i modernitetit për shoqërinë shqiptare që shkon përtej politikës së ditës. Ndaj na duhet para së gjithash të përcaktojmë një emërues të përbashkët, sesi do të punojmë për të përmirësuar cilësinë dhe shpejtësinë e këtij procesi.”- shprehet deputeti.
Në fund të mesazhit të tij ai bën apel për përgjegjshmëri, largpamësi dhe pronësi mbi reformat!/ Opinion.al
