Shqipëria është përfshirë në një skandal, pasi i ka dhënë shtetësinë dy vëllezërve indianë të këkruar për pastrim parash në shifra që kapin vlerën e rreth 725 milionë dollarëve.
Dy vëllezërit indian Sandesara kanë qenë pronarët e kompanisë farmaceutike Sterling Biotech. Përgjatë viteve 2008-2011 ata kanë marrë mbi 725 milionë dollarë kredi nga disa banka shtetërore të Indisë, para të cilat nuk kanë shkuar në llogarinë e Sterling, por janë zhdukur përmes një rrjeti prej 300 kompanish offshore të ngritura nga vetë ata.
Skandali shpërtheu në janar të vitit të kaluar kur agjencia e krimit ekonomik në Indi arrestoi drejtorin e Andra Bank, bankës më të madhe e cila kishte lëvruar kreditë për vëllezërit Sandesara.
Në po të njëjtën kohë autoritetet indiane bllokuan pronat e kompanisë Sterling Biotech, e cila u fut në proces falimentimi. Por dy vëllezërit Sandesara u arratisën nga India.
Por teksa në google gjatë muajit janar mund të gjeje informacion për Nitin Sandesara dhe Chetankumar Sandesara (sidomos për mashtrimin) ata arrijnë të marrin shtetësinë shqiptare. Dy vëllezërit indianë kanë marrë pasaportën shqiptare në 6 shkurt të 2018. Por a e ka bërë si duhet punën Ministria e Brendshme në këtë rast? Një përgjigje tani mund të jap vetëm zoti Sandër Lleshaj, i cili është ministër i Brendshëm.
Dy janë procedurat e marrjes së nënshtetësisë shqiptare, parashikuar në ligjin 8389 të vitit 1998.
E para, dorëzimi i aplikimit në Ministrinë e Punëve të Brendshme, ku një prej kushteve themelore parashikuar në nenin 9 për aplikantin është: “Të ketë banuar ligjërisht në territorin e Republikës së Shqipërisë, në mënyrë të vazhdueshme, për jo më pak se 5 vite”.
Pikërisht ky kusht nuk plotësohej nga vëllezërit Nitin Sandesara dhe Chetankumar Sandesara, por pavarësisht kësaj, ata e morën nënshtetësinë shqiptare, megjithëse India kishte nisur kërkime në të gjithë botën për t’i arrestuar.
Ka edhe një mënyrë të dytë parashikuar në ligj për marrjen e nënshtetësisë shqiptare. Përdorimi i një klauzole në pikën 7 të nenit 9 të këtij ligji, ku parashikohet:
“Të huajit, që ka mbushur moshën 18 vjeç, mund t’i jepet shtetësia shqiptare me natyralizim, edhe në qoftëse nuk plotëson kushtet e këtij ligji, me përjashtim të pikës 6, në qoftëse Republika e Shqipërisë ka një interes shkencor, ekonomik, kulturor dhe kombëtar”.
Pikërisht ky nen i ka dhënë mundësi dy shtetasve më të kërkuar në Indi, të anashkalojnë një mori me kërkesa për marrjen e nënshtetësisë shqiptare. Edhe Presidenti i Republikës që reagoi për këtë çështje tha se është zbatuar ky nen. (LEXO LAJMIN KËTU)
Opinion.al pyeti në Presidencë se nga ka ardhur propozimi që dy vëllezërit indianë të marrin shtetësinë shqiptare dhe përgjigjia ishte: Propozimi ka ardhur nga Ministria e Turizmit dhe Mjedisit./Opinion.al
LEXO EDHE- Në kërkim për mashtrim, Bushati e bëri konsull nderi
