Të gjitha linjat e jashtme të furnizimit me energji elektrike për centralin bërthamor Zaporizhja të Ukrainës, të zaptuar nga Rusia, janë jashtë funksionit të premten, tha agjencia bërthamore e OKB-së.
Ukraina e fajësoi Rusinë se bombardimet e saj e ndërprenë furnizimin e centralit me energji elektrike.
Centrali më i madh bërthamor në Evropë – i cili nuk punon por i nevojitet energjia elektrike për ta mbajtur të ftohtë lëndën bërthamore – është duke u furnizuar me energji tani përmes gjeneratorëve me naftë, tha Agjencia Ndërkombëtare për Energjinë Atomike (IAEA).
IAEA-ja ka paralajmëruar vazhdimisht për rrezikun e një katastrofe në Zaporizhja, pasi ky central bërthamor ndodhet pranë vijës së frontit në luftën në Ukrainë.
Që të gjashtë reaktorët e centralit janë të fikur, por lënda bërthamore brenda tyre ka ende nevojë për ftohje të vazhdueshme, gjë që kërkon furnizim të vazhdueshëm me energji
“Centrali bërthamor i Ukrainës (ZNPP) humbi të gjithë furnizimin me energji nga jashtë në orën 17:36 sot. Hera e nëntë gjatë konfliktit ushtarak dhe hera e parë që nga fundi i vitit 2023”, tha IAEA në X.
“Aktualisht, ZNPP-ja mbështetet në energji e siguruar nga gjeneratorët emergjentë me naftë. Kjo thekson gjendjen jashtëzakonisht të rrezikshme të sigurisë bërthamore”, tha ajo.
Ministri i Energjisë i Ukrainës, German Galuschenko, shkroi në Telegram se një sulm rus kishte shkaktuar ndërprerjen e energji në centralin e Zaporizhjas.
“Armiku goditi linjën e energjisë që lidh centralin [bërthamor Zaporizhja], i cili ndodhet përkohësisht nën pushtim, me sistemin energjetik të integruar të Ukrainës”, tha ai.
As IAEA dhe as menaxhmenti i vendosur nga Rusia në central nuk dhanë fillimisht ndonjë arsye për ndërprerjen e energji .
“Arsyet për shkëputjen janë duke u sqaruar. Pajisjet në central janë në një gjendje të sigurt dhe nën kontrollin e stafit. Nuk janë vërejtur shkelje të kushteve të sigurisë”, tha menaxhmenti i vendosur nga Rusia. /REL
