Presidenti, Ilir Meta, këtë të premte ka qenë i pranishëm në ceremoninë përkujtimore që u organizua në Shkoder me rastin e 30-vjetorit të vrasjes së Martirëve të Demokracisë.
Në një dalje për mediat pas ceremonisë Meta tha se edhe pas 30 vitesh, Shqipëria vuan ende nga “fenomeni i partisë-shtet”. Më tej, Meta tha se në 25 prill fuqinë e votës ta përdorim për të mbrojtur demokracinë, për të mos lejuar më shpopullimin e Shqipërisë.
“U vranë pabesisht vetëm sepse dolën në mbrojtje të demokracisë. Sot jemi këtu për ti nderuar ata dhe për ta çuar deri në fund amanetin e tyre, por edhe të dëshmorëve të tjerë që ranë për demokracinë dhe për zgjedhje të lira dhe mendimi e lirë në Shqipëri, sepse ende Shqipëria vuan nga kapja e shtetit, nga partia shtet dhe nga zgjedhjet e lira që ka mbajtur peng integrimin në BE. Është momenti që të gjithë të nisemi drejt 25 prillit, kësaj dite vendimtare por të vendosur vendin në shinat e Kushtetutës dhe demokracisë. Unë jam i bindur se Shkodra do të jetë gjithmonë në krye të këtij marshimi. Duke e bërë çdo gjë për suksesin e demokracisë, ne nderojmë jo vetëm sakrificën e martirëve të 2 Prillit, por edhe atyre që në emër të fjalës së lirë, demokracisë, u martirizuan gjatë të shkuarës së errët të regjimit autoritar. Vendi është në një situatë kritike, nga ku unë jam i bindur se do dalim me sukses pas ndërgjegjësimit se vota është e shenjtë. Unë çdo përgjegjësi që kam do ta shlyej duke qenë në mbrojtje të votës së lirë më 25 prill. Kështu do nderojmë edhe kujtimin e të gjithë patriotëve që u martirizuan. Fuqinë e kësaj vote ta përdorim për të mbrojtur demokracinë, për të mos lejuar më shpopullimin e Shqipërisë, e për t’i zëvendësuar ata me qytetarë nga vendet e tjera, pasi do mjaftonte një fshat i Indisë për të shpopulluar”, tha Meta./Opinion.al
