Shtetet e Bashkuara dhe aleatët u zotuan të shtojnë furnizimet me armë për Ukrainën, pas ashpërsimit të ofensivës ruse në rajonin lindor të Donbasit. 7 avionë me armë amerikane pritet të nisen drejt Europës gjatë orëve në vazhdim, sipas një zyrtari të lartë të mbrojtjes.
Ato janë pjesë e paketës prej 800 milionë dollarësh që administrata Biden autorizoi javën e kaluar, e ku përfshihen armë të artilerisë së rëndë, helikopterë dhe automjete të blinduara. Por, Moska paralajmëroi se forcat e armatosura ruse do të shkatërrojnë të gjitha ato që i cilëson armë të vjetëruara të Perëndimit në Ukrainë.
Dmitry Polyansky, zv/ambasadori i Rusisë në OKB, shprehet: “Shtetet e Europës Lindore në NATO duken të kënaqura. Nuk duhet të mendojnë më se si të heqin qafe armët e vjetëruara të epokës sovjetike. Edhe pse premtojnë t’i japin Ukrainës pajisje të reja të nivelit të NATO-s, dërgojnë atje ekzemplarë që nuk arrijnë as të qëllojnë apo lëvizin, duke e ditur se forcat ruse do t’i shkatërrojnë hekurishtet”.
Sakaq, Kievi shprehu zhgënjim të thellë për deklaratën e kancelarit gjerman Olaf Sholc se kapacitetet e eksportit të forcave të armatosura janë ezauruar. Mes luftimeve të ethshme në terren dhe përplasjeve të vazhdueshme me Perëndimin në frontin diplomatik, Moska e kthen vëmendjen nga bisedimet e paqes.
Zëdhënësi i Kremlinit, Dmitri Peskov, tha se i kishte dorëzuar Ukrainës një draft-dokument të formuluar qartë mbi negociatat dhe se topi është tani në anën e Kievit: “Kontaktet vijojnë në nivelin e lartë brenda kornizës së procesit të negociatave. Dua të kujtoj atë që tha presidenti, se fatkeqësisht, pala ukrainase nuk është konsistente lidhur me pikat ku ka pasur dakordësi. Ndryshon vazhdimisht qëndrim dhe prandaj procesi i negociatave le për të dëshiruar”.
Procesin e negociatave e komentoi edhe zëdhënësja e Ministrisë së Jashtme, Maria Zakharova, e cila tha për televizionin Rusia 24 se nuk i besojnë më negociatorëve ukrainas.
