NATO mohon akuzat e Presidentit të Bjellorusisë Aleksandër Lukashenko se “fuqitë e huaja” po organizojnë trupa në kufijtë e vendit. Organizata e Atlantikut të Veriut thotë se të tilla deklarata janë të pabaza. I veshur me rroba ushtarake, Lukashenko tha se kishte vendosur forcat e tij të armatosura në “gatishmëri të lartë”.
Ai tha se kishte marrë informacione për lëvizje trupash ushtarake në Poloni dhe Lituani dhe ndaj ai kishte urdhëruar lëvizjen e forcave ushtarake në kufirin perëndimor të vendit.
“Ata po trondisin situatën brenda vendit tonë, duke u përpjekur të rrëzojnë autoritetet”, tha Lukashenko, duke shtuar se ai kishte porositur shefat e tij të sigurisë “të marrin masat më të ashpra për të mbrojtur integritetin territorial të vendit . Ai akuzoi NATO-n se po përpiqet të ndajë Bjellorusinë dhe të instalojë një president të ri në Minsk.
Por Nato sqaroi se ajo nuk përbënte asnjë kërcënim për Bjellorusinë ose ndonjë vend tjetër dhe se nuk kishte “përgatitje ushtarake në rajon”.
“Regjimi bjellorus po përpiqet të largojë vëmendjen nga problemet e brendshme me deklarata krejtësisht të pabazuara për kërcënime të jashtme imagjinare,” u përgjigj Presidenti i Lituanisë Gitanas Nauseda për agjencinë e lajmeve AFP.
Edhe një zyrtar i presidencës polake e konsideroi deklaratën e Lukashenkos se Polonia po planifikonte destabilizim në kufi një “propagandë të regjimit, të trishtueshme dhe befasuese”.
“Qëndrimi ynë është rreptësisht mbrojtës“, tha ai.
Në kryeqytetin bjellorus vijojnë protestat e opozitës që kërkojnë largimin e Lukashenkos që u rizgjodh për një tjetër mandat në 9 Gusht pasi ka qëndruar për 26 vite në pushtet, por zgjedhjet u konsideruan si të manipuluara.
TV Klan
