Shtetet e Bashkuara largohen zyrtarisht nga Organizata Botërore e Shëndetësisë këtë të enjte, pavarësisht se një lëvizje e tillë është në shkelje të një ligji amerikan që kërkon që Uashingtoni t’i paguajë agjencisë së Kombeve të Bashkuara 260 milionë dollarë tarifa të detyrueshme.
Largimi nga ky organizëm ndërkombëtar u njoftua nga Donald Trump që në ditën e parë të presidencës së tij një vit më parë, nëpërmjet një urdhri ekzekutiv. Ligji amerikan kërkonte një njofim paraprak 1 vjeçar dhe pagesën e gjithë tarifave të detyruara para largimit.
Një Zëdhënës i Departamentit të Shtetit tha se Organizata Botërore e Shëndetësisë kishte dështuar të menaxhonte dhe ndante informacionin gjë që i kushtoi Uashingtonit triliona dollarë.
“Populli amerikan i ka paguar më shumë se sa duhet kësaj organizate dhe kjo goditje ekonomike është përtej një pagese fillestare për çdo detyrim financiar ndaj organizatës”, tha zëdhënësi.
Por agjencia tha se ka punuar me Uashingtonin dhe ka ndarë informacione gjatë vitit të kaluar dhe theksoi se Shtetet e Bashkuara nuk i kanë paguar tarifat që u detyrohen për vitet 2024 dhe 2025.
Për agjencinë e Kombeve të Bashkuara largimi i Uashingtonit është një humbje e madhe. Kjo tashmë ka shkaktuar një krizë buxhetore dhe ekipet e punës janë përgjysmuar, ndërsa buxhetet janë reduktuar në të gjithë organizatën. Deri në mesin e këtij viti, Organizata Botërore e Shëndetësisë do të ketë shkurtuar rreth 1 të katërtën e stafit.
Pas largimit të Shteteve të Bashkuara nga kjo agjenci, nuk është e qartë si do të funksinojë bashkëpunimi në të ardhmen, teksa Donald Trump e ka nxjerrë vendin edhe nga struktura të tjera ndërkombëtare.
