Drejtori i Përgjithshëm i Policisë së Shtetit, Gledis Nano ka marrë pjesë në analizën vjetore të Drejtorisë Vendore të Policisë së Kukësit.
Nano ka vlerësuar punën dhe rezultatet e arritura nga strukturat vendore dhe ato kufitare që operojnë në qarkun Kukës dhe për angazhimin maksimal të strukturave gjatë sezonit turistik.
Ai ka theksuar se është prioritar dominimi i situatës kriminale nga Policia e Shtetit.
Ndërsa për parandalimin e kultivimit të kanabisit është shprehur se është prioritet dhe sfidë personale e profesionale e tij dhe e gjithë Policisë së Shtetit.
Nano ka theksuar se qarku i Kukësit është qark kufitar dhe për rrjedhojë krimet ndërkufitare janë prioritare.
Ai ka thënë se është i domosdoshëm parandalimi i krimeve ndërkufitare siç është ajo e dhënies ndihmë për kalim të paligjshëm emigrantëve nga vendet e treta por edhe të gjitha krimeve të tjera ndërkufitare.
Drejtori i Përgjithshëm ka kërkuar nga strukturat e Policisë, që të kenë një angazhim më të mirë për parandalimin e krimit, veçanërisht krimit të rrugës, aksidenteve rrugore, prishjes së rendit dhe sigurisë, pasi këto kanë impakt të drejtpërdrejtë te qytetarët dhe aty fillon edhe perceptimi që kanë qytetarët për punën e Policisë.
Ai ka thënë se forcimi i bashkëpunimit midis Policisë, pushtetit vendor, institucioneve, shkollave dhe organizatave joqeveritare janë prioritete kryesore për vitin 2022.
Duke qenë se qarku i Kukësit ka zona turistike dhe frekuentohet nga mijëra turistë, duhet angazhim akoma më shumë për krijimin e një ambienti sa më të sigurt për turistët, që është dhe prioritet kombëtar.
Në qarkun e Kukësit janë evidentuar tri raste të turistëve që kërkonin ndihmë, pasi kishin mbetur në zona malore. Shërbimet e Policisë, duke rrezikuar edhe jetën e tyre, u kanë ardhur në ndihmë dhe i kanë shpëtuar, gjë që tregon qartë se Policia është e angazhuar maksimalisht për të krijuar një ambient sa më të sigurt, që turistët të ndihen të sigurt dhe ta vizitojnë sa më shumë vendin tonë.
Nisur nga situata e motit të keq me temperatura të ulëta, që priten në ditët në vijim, Nano ka kërkuar nga Policia e Kukësit, ato Kufitare dhe nga të gjitha strukturat e Policisë së qarqeve në të gjithë vendin, që të rrisin prezencën policore në rrugë, të rrisin gatishmërinë, që të jenë në ndihmë të përdoruesve të rrugës dhe të qytetarëve në nevojë.
