Aktualitet

Mungesa e kapaciteteve, Haki Çako: Vullneti human prevalon mbi mjetet


Bëhu pjesë e Grupit Zyrtar të Opinion.al
>> KËTU <<
               Publikuar në : 18:24 - 07/12/19 |
Al Do

Drejtori i Përgjithshëm i Agjencisë Kombëtare të Mbrojtjes Civile, Haki Çako i është përgjigjur akuzave të ngritura se ekipet e shpëtimit nuk ishin të pajisur me mjetet e duhura për përballimin e situatave të jashtëzakonshme.

Sipas tij vullneti dhe gatishmëria e njerëzve prevalon në këto situata mbi mjetet teknologjike.

“Vullneti human dhe njerëzor prevalon mbi mjetet, mbi teknologjinë e cila udhëhiqet nga njeriut. Gjithsesi teknologjia ka efektet e veta dhe ne jemi duke punuar intensivisht për ngritjen e plotë të agjencisë kombëtare të mbrojtjes civile, që është institucioni kryesore që bën politikat e qeverisë për mbrojtjen civile për reduktimin e riskut. Por të gjitha strukturat duhet të kompletohen në këtë aspekt. Sot të gjitha njësitë administrative, bashkitë apo edhe institucionet e tjera, janë të detyruara të planifikojnë përpara se të ndodhin fatkeqësitë natyrore në buxhetin e tyre, 2- 4 % për njësitë vendore, për të gjitha institucionet.”, tha Çako në një intervistë televizive.

Sa i përket tërmetit ai tha pasojat ishin të paparashikura dhe njoftoi gjithashtu se goditja 6.4 Rihter u shoqërua me 1622 pasgoditje e lokalizuar kjo në 247 pika.

“Është një fatkeqësi natyre që përfshin thuajse gjithë shoqërinë, ishte një tërmeti i një kapaciteti të lartë me pasojë që nuk ishin parashikuar, pasi momentin që jep efektet e veta, pasojat janë të jashtëzakonshme, lidhen me jetën shëndetësinë por më pas sigurisht edhe me pasurinë edhe me gjithë ekonominë e individit e shoqërisë. Si çdo qytetar edhe ne, në momentin e tërmetit së pari duhet të veprojmë në mënyrë instiktive, tërmeti krijon edhe panikun e vet. Tërmeti i 26 nëntorit, ka qenë i shoqëruar nga një goditje e cila ka nisur në mbrëmjen e datës 25 rreth orës 22:30 minuta, më pas një goditje tjetër rreth orë 3:00 dhe më pas me goditjen 6.4 Rihter, me goditjen më të madhe, për t’u shoqëruar më pas me rreth 1622 pasgoditje, që kanë qenë të lokalizuara në 247 pika, por që janë tashmë të njohura, është kryesisht zona e Hamallajt, ose zona e Durrësit me epiqendër kryesore, duke përfshirë edhe pjesën më kufitare të saj të Krujës, të Lezhës e të Tiranës.”, shtoi Çako. /Opinion.al

Pas