Ministrja e Shëndetësisë dhe Mbrojtjes Sociale Ogerta Manastirliu, ka qenë ditën e sotme në Qendrën Shëndetësore Nr.8, teksa ka bërë me dije se testimi i shpejtë ka nisur në 4 pika të reja në Tiranë, duke e çuar në 10 numrin e tyre. Gjithashtu bëhet me dije se në këto pika do të kryhet edhe testimi me metodën klasike të PCR.
“Pasi vlerësuam ecurinë e gjashtë pikave të para të testimit në komunitet në Tiranë, përsa i përket kohës, por edhe situatës epidemiologjike mbi të gjitha, vendosëm që të shtojmë edhe katër pika të tjera. Në qendrën shëndetësore nr.8, në qendrën shëndetësore Kamëz, në qendrën shëndetësore nr.1 dhe në qendrën shëndetësore nr. 3. Pra janë hapur 10 pika testimi në komunitet në Tiranë, ndërkohë që në gjithë Shqipërinë janë 55 pika të testimit të shpejtë”, tha Manastirliu.
Ministrja Manastirliu gjatë fjalës së saj ka përmendur edhe mutacionet e reja të COVID-19. Sipas saj një punë e madhe është duke u bërë përsa i përket kapjes së mutacioneve apo varianteve të reja të virusit.
“Ne kemi vendosur që në këto pika testimi të përfshijmë gjithashtu dhe testimin nëpërmjet PCR. Ky një element i shtuar përsa i përket punës dhe identifikimit të rasteve të dyshuara në territor. Por edhe punës që ne jemi duke bërë për kapjen e mutacioneve dhe varianteve të reja, që është një pikë shumë e rëndësishme dhe për të cilën janë trajnuar i gjithë ekipi ynë i epidemiologëve. Ne jemi në bashkëpunim edhe me institutet ndërkombëtare për identifikimin dhe kapjen në kohë të varianteve të reja të COVID19”, tha Manastirliu.
Ndërkaq, Shefja e Departamentit të Epidemiologjisë dhe Kontrollit të Sëmundjeve Infektive në ISHP, Silva Bino, u shpreh se ku institucion është duke bashkëpunuar me institucione të tjera në Gjermani për identifikimin e varianteve të reja të virusit.
“Ne jemi duke shfrytëzuar dhe metodika të tjera, të cilat na janë vënë në dispozicion nga kolegë të ndryshëm në lidhje me testimin nëpërmjet PCR, për identifikimin, jo saktësisht të variantit, por që identifikojmë nëse kemi të bëjmë me diçka të re. Ndërkohë po bëhen gati mostrat e tjera për t’u dërguar pranë Institutit të Virologjisë Charite në Berlin. Dhe natyrisht kjo është një punë që do të vazhdojë, krahas punës së laboratorit me PCR, do të vazhdojë edhe puna për dërgimin e vazhdueshëm të mostrave në lidhje me identifikimin e të gjitha varianteve të reja, jo vetëm variantit britanik, por të çdo lloj variant të ri, në mënyrë që këto mutacione të kapen në kohë”, tha Bino./Opinion.al
