Kryeministri Rama në takimin me kancelaren gjermane Merkel në Berlin, foli për influencë ruse në Ballkanin Perëndimor. Ai paralajmëroi BE-në se nëse në këtë Dhjetor nuk na jepni statusin kandidat për në BE, rusët janë në prag të derës. Ky presion i hapur u shoqërua më pas me deklaratën në emisionin e Sokol Ballës, ku tha se ai është i gatshëm që të bëjë një vizitë të nivelit të lartë në Moskë, pra të takojë Vladimir Putin.
Në këtë situatë një njoftim “i çuditshëm” dhe me tone ngazëlluese është shpërndarë dje, nga ambasada ruse në Tiranë për mediat.
“Kemi kënaqësinë t’ju përcjellim informacionin për vizitën e Ministres së Kulturës znj. Kumbaro në Forumin Kulturor të Shën Petërburgut;
Më 2 dhjetor, në kuadër të Forumit, Ministrja e Kulturës së Shqipërisë, Mirela Kumbaro, e cila kryeson delegacionin shqiptar në Shën Petërburg, bashkë me homologun e saj rus, Vladimir Medinski, kanë nënshkruar Programin e bashkëpunimit kulturor ndërmjet ministrive të kulturës së dy vendeve për periudhën 2017-2019. Gjithashtu, një ditë më parë, në një nga seancat e Forumit, ku morën pjesë përfaqësues të vendeve të ndryshme si Italia, Greqia, Sllovenia, Serbia etj., Ministrja Kumbaro mbajti një fjalim kushtuar çështjeve të ruajtjes së trashëgimisë kulturore dhe planeve për të intensifikuar dialogun kulturor Rusi-Shqipëri.
Sipas mediave ruse këtë aktivitet pritet që sot ta vizitojë, edhe presidenti rus Putin. Kumbaro është një nga të paktat pjesëmarrëse në këtë forum në nivelin e ministres, nga vendet europiane që janë anëtare dhe aspirante për BE-në. Do ta takojë atë Putin, si një paradhënie për vetë-ofrimin që Rama i mërzitur me Merkelin dhe BE-në, i ka bërë “papritur” kohët e fundit? Mbetet për tu parë.
Thamë më lartë për njoftimin e ambasadës ruse se është “i çuditshëm”, sepse bie në sy fakti që njoftimi i vizitës së një ministreje të kabinetit Rama në Moskë, nuk është bërë nga qeveria dhe as nga institucioni që ajo drejton.
SYRI.net, konsultoi faqen zyrtare të ministrisë së Kulturës dhe aty nuk gjendet asnjë njoftim për këtë udhëtim të rëndësishëm. Ndërkohë që mund të shohësh të publikuara edhe “cikërrima” të punës dhe takimeve të përditshme të ministres Kumbaro.
Shtrohet natyrisht pyetja; përse është mbajtur i fshehtë ky takim dhe përse nuk ka asnjë njoftim zyrtar nga ana e qeverisë apo ministrisë përkatëse?
Përse opinion publik duhet ta mësojë këtë vizitë jo të zakonshme, në këtë situatë të krijuar pas deklaratave të Ramës, pikërisht nga ambasada ruse?
