Disa qytetarë nga Kosova kanë ngelur në Afganistan dhe nuk po munden dot të largohen për shkak të luftës.
Lajmi është konfirmuar nga Ministria e Jashmte e Kosovës, e cila në një njoftim bën me dije se po kontakton me 3 qytetarë të cilët po përpiqet t’i ndihmojë për tu larguar nga Afganistani. MPJD konfirmon se qytetarët janë mirë dhe nuk rrezikohen.
“Ministria e Punëve të Jashtme dhe Diasporës (MPJD), është duke vazhduar angazhimin intensiv edhe gjatë ditës së sotme për të identifikuar dhe ndihmuar shtetasit e Kosovës që ndodhen në Afganistan me qëllim të largimit sa më të shpejt nga atje.
Deri në mesditën e së hënës, MPJD është në kontakt të drejtpërdrejt me tre shtetas dhe po angazhohet për t’ju dalë në ndihmë. Ata janë në gjendje të mirë dhe nuk janë të rrezikuar”, thuhet në njoftim.
Po ashtu Ministria i bën thirrje të gjithë qytetarëve nga Kosova që ndodhen në Afganistan të lajmërojnë në linjën emergjente për të marrë udhëzimet dhe ndihmën e duhur.
“MPJD-ja u bënë thirrje të gjithë shtetasve tanë në Afganistan që të lajmërohen në linjën emergjente me numër +383 45 492 316, për të marrë sa më parë udhëzimet dhe ndihmën e duhur.
Qeveria e Republikës së Kosovës mbetet e përkushtuar që së bashku me partnerët ndërkombëtar të ofroj të gjitha mjetet në dispozicion deri në evakuimin e të gjithë shtetasve tanë nga Afganistan”, thuhet në njoftim.
