Presidenti i Republikës Ilir Meta paralajmëroi tubim në Bulevardin Dëshmorët e Kombit në datën 2 mars ku siç tha ai do të “firmoset dekreti i parë për shpartallimin e grushtit të shtetit”. Ai kishte një përgjigje edhe për kryeministrin Edi Rama që mbrëmë tha se ‘Ku e ka popullin ky, në WhatsApp?’ duke thënë se “Ata që kërkojnë popullin e Presidentit të WhatsApp të përgatisin poturet e gjëra“.
“Pjesëmarrës në këtë grusht shteti është vetë qeveria dhe gjysmë-parlamenti. Së dyti ka edhe persona të tjerë, që do të ketë padi të reja, çdo ditë do të ketë lajme për grushtin e shtetit. Do të marrim me qetësi çmontimin e plotë të grushtit të shtetit. Nëse kjo godinë, ky institucion është sot një kështjellë e vetme, për fat të keq, por e pamposhtur e mbrojtjes së demokracisë, nga data 2 mars kur do të firmoset dekreti i parë kundër grushtit të shtetit, përpara popullit në bulevard, ku do të lidhim një besëlidhje për të shpartalluar regjimin e oligarkëve, me qëllim shpopullimin e këtij vendi, duke e kthyer në një bazë operacionale të krimit të organizuar, por edhe shumë problemeve të tjera. Në 2 mars ju presim të gjithëve pasdite në bulevardin Dëshmorët e Kombit, falë popullit shumë shpejt, nuk do të ketë vetëm një institucion që është Presidenti në mbrojtje të Kushtetutës, por të gjitha institucionet që janë në bulevard do i kthehen popullit. Ata që kërkojnë popullin e Presidentit të Whatsapp të përgatisin poturet e gjëra”, tha Meta në konferencën për mediat.
Presidenti i Republikës, kishte paralajmëruar më herët se do të paraqiste fakte për “grushtin e shtetit” i cili siç tha ai është “frymëzuar dhe ideuar nga kryeministri” Edi Rama dhe synon “shpartallimin e shtetit në emër të disa oligarkëve, mafias ndërkombëtare dhe organizatave kriminale që duan ta bëjnë Shqipërinë lavatrice të parave të tyre.”
Meta deklaroi se nisma e Kuvendit për ndryshime në zgjedhjen e anëtarëve të Gjykatës Kushtetuese është bërë me porosi nga Këshilli i Ministrave. Realcioni i atij që ai e quajti “gjysëmparlamenti” për nismën ligjore, jep informacione jo të vërteta sipas Presidentit kur thotë se ai është konsultuar me institucione të tjera të drejtësisë.
“Gjysmë parlamenti në relacionin e tij që shquhet për gënjeshtra dhe mashtrime, thotë se kjo nismë, që për të bërë betimin në kafene apo buzë Lanës ka marrë aprovimin e KLP, KLGJ, Magjistratura, Fondacioni Soros (që nuk besoj), ministria e Drejtësisë, etj. Këto përgënjeshtrohen, në radhë të parë nga Dvorani, që thotë se nuk ka dhënë asnjë mendim në mbështetje të këtij grupi shteti. Dhe unë këtu e duartrokas, se veproi në përputhje me ligjin.
Këtu kemi një përgënjeshtrim tjetër të parlamentit të dele-deputetëve. Ku thotë se Shkolla e Magjistraturës nuk ka dhënë opinion për këtë ligj fare, falenderoj edhe zotin Sadushi. Vijmë te Komiteti Shqiptar i Helsinkit, që thotë se ligjet duhet ti nënshtrohen konsultimit me Presidentin, etj. Lidhur me këtë propozim, pra betimin te Lana, KSHH, vlerëson se ceremonia e betimit te Presidenti nuk mund të realizohet në formë të shkruar. KSHH thotë se akti i betimit duhet të bëhet vetëm përpara Presidentit“, tha Meta/Opinion.al
