Presidenti i Ilir Meta i ka kthyer përgjigje kreu të komisionit të ligjeve, Ulsi Manja lidhur me vendimin tij për anulimin e 30 qershorit, datë e cila ishte përcaktuar më herët për zhvillimin e zgjedhjeve lokale.
Në reagimin e tij, Meta shprehet se vendimi për dekretin e anulimit të 30 qershorit është marrë brenda ligjeve që përcakton Kushtetuta e Shqipërisë.
“Ky dekret është botuar në fletoren zyrtare e për pasojë është i njohur dhe i detyrueshëm për zbatim nga të gjithë përfshi këtu edhe Kuvendin”,- thuhet në shkresën që kreu i shtetit i dërgon kreut të komisionit të ligjeve, përmes sekretares së përgjithshmë të institucionit, Ornela Zonja.
Po ashtu, në këtë letër thuhet se presidenti vlerëson se e gjithë veprimtaria aktuale parlamentare që përpiqet të godasë veprimtarinë e Presidentit, por pa mundur të rrëzojë përmbajtjen e dekretit të tij, është një proces i rremë dhe i pambështetur në argumente kushtetues, por vetëm i orientuar verbërisht politikisht.
Në këtë letër shkruhet gjithashtu se, presidenti garanton Kuvendin se është i gatshëm që të ndërmarrë të gjitha vendimet e rëndësishme që do të diktojë situata. Ai shton se kë vendime do të merren në përputhje me kompetencat që i jep Kushtetuta për ti shërbyer të gjithë popullit shqiptar.
Kujtojmë që kryetari i grupit parlamentar të PS, Taulant Balla ka paraqitur në Komisionin e Ligjeve kërkesën e 55 deputetëve për shkarkimin e presidentit Ilir Meta, pas anulimit të datës së zgjedhjeve.
Mazhoranca e akuzon Metën se ka marrë kompetencat e Parlamentiti për dekretimin e anulimit të 30 qershorit, kjo gjë sipas tyre, tregon që presidenti ka shkeluar Kushtetutën./ Opinion.al E.Xh.
