I menjëhershëm ka qenë reagimi i Kryetarit të Partisë së Lirisë, Ilir Meta pasi kryeministri Edi Rama, foli për përmendjen e emrit të tij në dosjet e Ish-Sigurimit të Shtetit.
Në një status në rrjetin social “Facebook”, Meta publikon foto të disa karikaturave të kohës komuniste, për të cilat thotë se ishin vepër e Edi Ramës, të cilin e cilëson karikaturist i preferuar i Sigurimit.
Më tej ai shton se në shkrimin e porositur nga Sigurimi flitet për heroizmin e një “Mata Hari” shqiptare të quajtur Neta.
“Ju përshëndes me këtë karikaturë të karikaturistit të preferuar të Sigurimit, Edi apo Edvin Rama, përshtatur në një shkrim të revistës “Në shërbim të popullit”, 10 tetor 1983, ku çuditërisht në shkrimin e porositur nga Sigurimi flitet për heroizmin e një “Mata Hari” shqiptare të quajtur Neta”-shkruan Meta.
Më herët, kryeministri Rama tha se nuk e di a është Ilir Meta apo Metaj, ky spiuni me inicialet I.M, dhe se nuk e ka parë vetë dosjen, por theksoi se i beson Autoritetit të Dosjeve për këtë çështje.
