Gazetari Blendi Fevziu ka falenderuar përmes një postimi në rrjetet sociale, të gjithë shqiptarët jashtë vendit, që në këto ditë të përballjes së botës me koronavirusin, kanë ditur të shkëlqejnë. Me profesione nga më të ndryshmet, ata janë bërë pjesë e raportimeve të mediave nga të gjithë anët e globit, ndërsa sikurse shkruan gazetari i njohur: “modestë, te shkolluar, realistë, ata janë shpresa që i mungon këtij vendi”.
Bashkë me këtë falenderim, Fevziu kërkon edhe falje, për faktin që padashje sikurse thotë kemi qenë të pavëmendshëm ndaj tyre.
Postimi i plotë
Faleminderit
Ka shumë njerëz që mund të falenderohen këto kohë. Nuk dua t’i përsëris sërish kategoritë, edhe pse e di që ka gjithnjë të tjerë që i harrojmë. Por besoj se në këtë pandemi duhet të falenderojme pafund edhe gjysmën e Shqipërise që nuk jeton aktualisht këtu. Ata shqiptarë brilantë, me karriera të mëdha apo më modeste, profesionistë të konfirmuar apo studentë, kudo që jetojnë, në Europë, Azi, SHBA. Pjesëmarres aktivë në media apo rrjete sociale, që kanë dhënë informacione, kanë raportuar apo janë munduar të këshillojnë. Modestë, të shkolluar, realistë, ata janë shpresa që i mungon këtij vendi. Ata janë po ashtu dëshmia më e mirë se shqiptarët dinë të arrijnë suksesin kur nuk rrethohen apo drejtohen nga mediokriteti dhe provincializmi.
Faleminderit shqiptarë të diasporës, që dashuria dhe meraku për prindërit, të afërmit e vendlindjen, ju ka sjellë këto javë kaq afër nesh. Dhe na falni, që kemi qenë padashje kaq larg dhe të pavemendshëm ndaj jush.
Kemi qenë bashkë në këtë pandemi e shpresoj që kështu do vijojë edhe më pas!/Opinion.al
