Aktori i njohur turk, Arda Oziri, është përcjellë ditën e sotme për në banesën e fundit, pas aksidentit tragjik që i mori jetën mesnatën e së dielës. Ai ishte i njohur për publikun nga roli i tij si Goktug në serialin “Ertugrul”.
Në ceremoninë mortore të aktorit 39 vjeçar, që u mbajt në Izmir të Turqisë, ishin të pranishëm të afërm dhe miq të tij, si edhe aktorët e njohur Burak Altay e Riza Kocaoglu.
Ky i fundit ishte shoku i ngushtë i të ndjerit, ku mbajti edhe disa fjalë në nder të Ozirit. Oziri “Ishte më i shpejti ndër ne. Tani e provoi edhe këtë”, u shpreh ai, ndërkohë që nëna e aktorit dhe e motra e tij mezi qëndronin në këmbë gjatë ceremonisë mortore.
Ndërsa Cengiz Çolak rrëfeu momentet e fundit të aktorit pak para se të ndaheshin përgjithmonë. “Mbrëmë ai ishte me mua për të parë finalen e Ligës së Kampionëve.
Kaluam një mbrëmje të këndshme, qeshëm shumë. I thashë, “mos shko në këtë orë, rri këtu”, por doli rreth orës 3:00 te mëngjesit. Ai u aksidentua. Kam humbur një mik të ngushtë”, u shpreh ai. Oziri u aksidentua kur motori i tij doli nga rruga dhe u përplas me një nga barrierat mbrojtëse në një lagje të Stambollit.
