Është marrë në pyetje për tre orë në ambientet e Komisariatit nr. 1 në Tiranë e ëma e 31-vjeçarit Gerti Shehu, i cili goditi me grushte kryetarin e PD, Sali Berisha.
Ajo është thirrur për të dhënë disa deklarime pas sulmit që bëri djali i saj ndaj kreut të Partisë Demokratike. Deri më tani nuk dihet ende se çfarë ka deklaruar ajo.
Pas deklarimeve, ajo është larguar me një ambulancë nga ambientet e komisariatit. Shkak mendohet se ka qenë gjendja jo e mirë shëndetësore e saj.
Në lidhje me këtë rast, kreu i demokratëve Sali Berisha ka thënë se Shehu është agjent i Policisë Kriminale. Por kjo është mohuar nga drejtori i Policisë së Shtetit, Muhamet Rrumbullaku, i cili ka hedhur poshtë akuzat duke thënë se Shehu nuk ka qenë ndonjëherë dhe nuk është agjent i asnjë strukture të Policisë së Shtetit.
Sipas një dokumenti të siguruar nga Tv Klan rezulton se agresori ka probleme të shëndetit mendor. Në Gusht të këtij viti ndaj tij është lëshuar një epikrizë.
Mjeku Psikiatër Sadik Lala e ka trajtuar atë pasi familjarët kanë raportuar se prej kohësh ai manifestonte ankth, frikë dhe dyshime pa arsye, si dhe ishte konfuz në mendime. Për herë të parë, ai ishte paraqitur në një klinikë me këto shenja në 10 janar të vitit 2018.
