Corriere della Sera ka zbardhur detaje lidhur me marrëveshjen e firmosur sot mes kryeministrit Edi Rama dhe homologes së tij italiane Georgia Meloni, në lidhje me emigrantët.
Sipas mediave italiane, qëllimi i kësaj marrëveshjeje është frenimi i trafikimit të qenieve njerëzore.
Marrëveshja nuk do të zbatohet për emigrantët që mbërrijnë në brigjet dhe territorin italian, por ekskluzivisht për ata që shpëtohen në det, me përjashtim të të miturve, grave shtatzëna dhe subjekteve vulnerabël.
Strukturat e krijuara, do të mund të strehojnë gjithsej deri në 3 mijë emigrantë, për një parashikim prej 39 mijë personash të mirëpritur në një vit, “për të përfunduar me shpejtësi procedurat për shqyrtimin e kërkesave për azil apo riatdhesimin e mundshëm”.
Marrëveshja synon të pengojë largimet dhe të krijojë parandalim kundër trafikimit të qenieve njerëzore. Protokolli u mbyll në thelb gushtin e kaluar, gjatë takimit që dy liderët zhvilluan dhe do të jetë funksional në pranverën e vitit 2024.
“Është marrëveshja e parë e këtij lloji, një marrëveshje historike jo vetëm për Italinë, por për të gjithë Bashkimin Evropian”, u tha në Palazzo Chigi.
Ku do të ngrihen strukturat?
“Në portin e Shëngjinit do të merremi me procedurat e zbarkimit dhe identifikimit, ndërsa në një tjetër zonë më të brendshme do të krijohet një strukturë tjetër e bazuar në modelin e Qendrave të Mbajtjes së Riatdhesimit (Cpr)”, shpjegoi Meloni, duke shtuar se forcat e policisë shqiptare do të bashkëpunojnë për të garantuar “sigurinë dhe mbikëqyrjen e jashtme të strukturave”.
Ndërtimi i zonave në portin e Shëngjinit do të jetë përgjegjësi e Italisë, ndërsa sipas asaj që shpjegohet nga burimet e Palazzo Chigi, nuk parashikohet asnjë kompensim ekonomik në favor të Shqipërisë./Opinion.al
