Për herë të parë, anija “Bel Espoir” u ndal në portin e Durrësit, si pjesë e nismës frymëzuese MED25, e mbështetur nga Selia e Shenjtë dhe Dioqeza e Marsejës.
25 të rinj nga brigje të ndryshme të Mesdheut, përfshirë edhe zona të prekura nga konflikte, janë pjesë e kësaj udhe që synon të mbjellë shpresë, dialog dhe solidaritet përmes një shkolle lundruese unike.
Imzot Arjan Dodaj tha se nisma sjell mesazhin për një Mesdhe më njerëzor.
“Durrësi bëhet përsëri një port paqeje, në një kontekst të vështirë realiteti të Mesdheut, siç ai që njohim të gjithë, veçanërisht sa i përket mungesës së paqes”, u shpreh Imzot Arjan Dodaj.
“Dje zhvilluam një takim të bukur me komunitetet e ndryshme fetare në Shqipëri; bektashinjtë, ortodoksët, myslimanët dhe katolikët. Diskutuam edhe për integrimin më gjithëpërfshirës të të gjithë komuniteteve në detin Mesdhe.
E kuptojmë shumë mirë se Shqipëria, si qendër e Mesdheut, është një vend mjaft I bukur, është si një leksion historie, ku mund të ndërtojmë paqen mes të gjithë komuniteteve. Për këtë arsye zgjodhëm të vinim në Shqipëri gjatë këtij projekti që zgjat 8 muaj“, u shpreh Atë Alexis Leproux.
Nga 4 deri më 6 gusht, Durrësi dhe Tirana mirëpresin aktivitete reflektuese dhe bashkëbisedime me të rinjtë, për të ndarë vizione mbi sfidat e përbashkëta si migracioni dhe bashkëjetesa.
“Jam nga Libani dhe më pëlqen që jam me një grup që ndan vlera me njëri-tjetrin dhe jo gjeografi“
“Jam nga Barcelona dhe kjo eksperiencë është një urë, një urë mes vendeve. Gjeja më e mirë që kemi ne në mesdhe është diversiteti që duhet ta përqafojmë”
“Jam nga Bosnje Hercegovina dhe e pëlqej këtu sepse është një vend ku mund të dëgjohesh“
Ky projekt, synon të bashkojë mbi 200 të rinj nga 20 deri në 30 vjeç, të cilët gjatë 8 muajve kalojnë bashkë përvoja të thella, debate, ushtrime komunitare dhe reflektim shpirtëror.
Pas Shqipërisë, “Bel Espoir” do të vazhdojë rrugën drejt Triestes, ku do të mbahet Festivali i Rinisë Mesdhetare.
Tv Klan
