Më 13 mars, TikTok u mbyll zyrtarisht në Shqipëri. Por nga dita e sotme (27 mars), platforma nuk mund të hapet më nga rrjetet ‘mobile’, ndërsa në WiFi funksionon ende. Eksperti i teknologjisë, Tomi Kallanxhi, u ndal shkurtimisht te kjo ngjarje gjatë diskutimit në programin “Rudina” në Tv Klan.
Ai tha se mbyllja e plotë e platformës është e vështirë, por sipas tij, po qarkullon ideja për të instaluar një program në kompanitë që ofrojnë internet në shtëpi për të kontrolluar si përdoret ai nga qytetarët. Kallanxhi theksoi se nuk ka informacion zyrtar nga instancat shtetërore, por kjo mund të përbëjë shkelje të privatësisë.
Tomi Kallanxhi: Është mbyllur vetëm nga kompanitë telefonike, kurse në ISP nga kompanitë që ofrojnë internet në shtëpi, është pak e vështirë për t’u mbyllur. Në kompanitë telefonike është pothuajse e pamundur për t’u mbyllur, edhe pse ka një skenar që po qarkullon nga Agjencia e Sigurisë Kibernetike që është duke u implementuar një skenar që nuk e di, ndoshta të ma replikojnë nëse nuk është e vërtetë, që po tentohet të monitorohet, të instalohet një ‘software’ brenda ISP-ve që të monitorojnë çdo qytetar se çfarë trafiku bën, çfarë ‘site’-sh viziton etj. Duke e ditur se çfarë ‘site’-sh viziton, ata mund të bllokojnë trafikun në momente të caktuara dhe duke e ditur nga URL-të ose ‘website’, kompanitë e internetit mund ta bllokojnë një URL të caktuar.
Rudina Magjistari: Po thua që kjo është forma që ndoshta mund të menaxhohet kjo pjesa e bllokimit të TikTok-ut?
Tomi Kallanxhi: Po them që ndoshta mund të kthehemi në një mini-Arabi Saudite në konceptin e kontrollit të privatësisë. Edhe pse BE me GDPR e kundërshton këtë gjë, por ndoshta duhet të vijë Autoriteti për Sigurinë Kibernetike që të na e kundërshtojë këtë gjë dhe ta përballim këtë histori. Është e komplikuar, por mund të jetë edhe shkelje për privatësinë për qytetarët shqiptarë./tvklan.al
