Është mbyllur sot procesi i pranimit të kandidaturave të prokurorëve që do të jenë pjesë e SPAK (Prokurorisë Speciale).
Sipas Kreut të Këshillit të Lartë të Prokurorisë, Gent Ibrahimi, janë 27 prokurorë të cilët kanë pranuar të jenë pjesë e kësaj strukture speciale, nga të cilët do të shpallen fitues 15 të tillë.
Gjatë një interviste për gazetaren Klodian Lala, Ibrahimi tha numri i kanditatëve është një lajm i mirë, pavarësisht skepticizmit që kanë edhe për shkak të vettingut.
“Është numër i mjaftueshëm për ne. E kuptoj hezitimin e prokurorëve, është bërë shkas edhe procesi i vettingut për një lloj skepticizmi të tillë. Fakti që kemi 27 kandidatë është lajm i mirë. Na takon neve që të zgjedhim tani më të mirët mes tyre”, tha Ibrahimi.
Lidhur mbi kriteret e përzgjedhjes, Ibrahimi tha se do të nisin nga aftësia për të hetuar në eficencë deri te aftësia që ata do të kenë për të konfiskuar pasuritë e krimit.
Lidhur me faktin që deri më tani kanë kaluar vetëm 5 kandidatë Vettingun, Ibrahimi sqaroi se “Kjo çështje do gjejë rregullim sipas ligjit. Kemi të bëjmë me një ngritje në detyrë ne do presim vettingun për të gjithë”,- tha ai.
Por pyetja kryesore është se sa kohë do të na duhet për të pasur Prokurorinë Speciale.
“Duke pasur parasysh volumin e madh, 10 dosje për çdo kandidat pra 270 dosje dhe faktin se nuk kemi mbështetje administrative dhe financiare, pra kjo do marrë kohë. Mund të marrim disa muaj në fund ne do ja dalim të bëjmë më të mirën”,- tha Ibrahimi.
