Autoritetet greke janë duke vëzhguar se ç’do të ndodhë me mbetjet e raketës më të madhe të Kinës, e cila u lëshua javën e kaluar dhe pritet të bjerë në tokë të Dielën në agim, pasi humbi kontrollin. Periudha e rënies parashikohej të ndodhë mes orës 21:12 të mbrëmjes së të shtunës deri në 12:46 të mesditës së dielë, sipas orës lokale.
Ministria e Jashtme kineze njoftoi të premten, se pjesa më e madhe e mbetjeve të raketës “Long March 5B” do të digjet sapo të hyjë në atmosferë dhe ka pak gjasa që të shkaktojë ndonjë dëm në tokë.
Mbetjet parashikohet të përplasen në një zonë rreziku ku bën pjesë edhe Greqia, ndaj dhe sikurse njofton Cnn grek, fluturimet ushtarake janë ndaluar.
Të gjithë organet e Mbrojtjes Civile janë vënë në gatishmëri për të trajtuar çdo emergjencë të shkaktuar në territor.
Më herët ushtria amerikane kishte njoftuar që Hapësira Amerikane e Administrimit e kishte monitoruar atë që ata e quajtën si hyrjen e pakontrolluar të raketës kineze në atmosferën e Tokës.
Sipas vlerësimeve të fundit të Departamentit të Mbrojtjes të SH.B.A.-së, rihyrja e raketës në atmosferë pritet të ndodhë rreth orës 02:00 (me orën Greke) të Dielën. Por ky parashikim ka një diferencë të konsiderueshme gabimi. Fillimisht ky gabim u llogarit 9 orë, ndërsa tashmë me afrimin e mbetjeve me tokën, gabimi shkon në 3 orë.
Sipas burimit të fundit, pika ku raketa do të hyjë sërish në atmosferë është afër ishullit verior të Zelandës së Re. Sidoqoftë, theksohet se hyrja e saj mund të bëhet kudo përgjatë rrugëve që mbulojnë pjesë të mëdha të planetit./Opinion.al
