Dy vëllerëzit Basho, të cilësuar si të rrezikshëm dhe anëtar të bandës së Llanajve në Vlorë janë lënë në burg. Seanca për dy vëllezërit është zhvilluar e ndarë dhe nën masa të forta sigurie.
Për Tesi Bashon është caktuar masa “arrest me burg” me qëllim ekstradimi pasi ishte në kërkim nga Itali, ndërsa vëllai i tij Satilno akuzohet për “Shtrëngim me dhunë për dhënie pasurie”, si dhe u sekuestruan arsenal armësh, municione, tritol e lëndë narkotike.
Tesilvan (Tesi) Basho, është i dënuar me burgim të përjetshëm në Itali për “vrasje”, “shfrytëzim prostitucioni” dhe “mbajtje dhe transportimi pa leje të armëve të zjarrit”, ndërsa mbi të rëndojnë edhe akuza nga shteti shqiptar.
Tesi Basho kishte precedent të theksuar kriminal në Shqipëri, në fushën e krimeve kundër personit dhe në fushën e narkotikëve.
Në momentin e ndërhyrjes së Policisë, Basho ka tentuar të reagojë dhe të largohet, por është neutralizuar. Në vitin 2016, Gjykata e Torinos e ka dënuar me burgim të përjetshëm, pasi më 24.01.2008, ka vrarë me armë zjarri dy shtetase që ushtronin prostitucion në qytetin e Torinos, Itali, njërën prej të cilave e shfrytëzonte vetë. Por në vitin 2016 ai kishte mundur të arratisej nga burgu i Rebibbia-s në Itali./ Opinion.al
