“BE nuk arriti të kapërcejë konfliktin e brendshëm për të mbajtur angazhimin e marrë në qershor, për çeljen e negociatave për anëtarësim me dy vende të tjera”.
Kështu e argumentoi ministri i Jashtëm në Detyrë, Gent Cakaj vendimin e BE-së për të mos hapur negociatat me Shqipërinë. Sipas tij Shqipëria i kë përmbushur kushtet, ndërsa BE kërkon reformimin.
“Ky vendim nuk vjen nga dështimi i Shqipërisë, por shfaqet si pasojë e një rrethanat kur BE është në një proces reformimi. Kjo është shtyrja e tretë radhazi. Suksesi i këtij procesi nuk varet vetëm nga puna e Shqipërisë. Shtyrja e vendimit nuk duhet kuptuar si dështim i politikave të zgjerimit të BE-së. Procesi i zgjerimit do të vazhdojë. Shtyrja e vendimit për çeljen e negociatave nuk do të thotë se në Shqipëri do të ketë vonesa për reformat. Ne do të vazhdojmë punën në 5 prioritetet kyçe, por edhe në qëndrimet e Bundestagut. Këto janë të nevojshme për ta bërë Shqipërinë europiane”, tha Cakaj.
Ai theksoi se në BE nuk ka unanimitet për hapjen e negociatave, por ka unanimitet se Shqipëria ka përmbushur kushtet. “Këtë e thonë të gjithë ministrat e BE me të cilët kam qenë në kontakt gjatë këtyre ditëve”.
Këmbëngulja e Francës, përkundrejt shumicës dërrmuese të vendeve anëtare të Bashkimit Europian, bëri që Këshilli Europian të mos dalë me një vendim për hapjen e bisedimeve për anëtarësim me Shqipërinë dhe Maqedoninë e Veriut. Për këtë temë vendet anëtare pritet të diskutojnë para samitit të Zagrebit, në maj të vitit të ardhshëm, por pa përcaktuar asgjë të qartë./ Opinion.al
